ത്രേതായുഗാരംഭത്തിലെ മഹാബലിയുടെ കഥയെ അടിസ്ഥാനമാക്കി മുന്‍ ഡിജിപി ആര്‍. ശ്രീലേഖ രചിച്ച നോവല്‍ ബലിപഥം ചരിത്രത്തിന്റെ മറുഭാഗങ്ങള്‍ തുറന്നുകാട്ടുന്ന മികച്ച സാഹിത്യകൃതി മാത്രമല്ല, പുരാതന കഥകളുടെ പുതിയ വ്യാഖ്യാനവും മാനവികമായ വീക്ഷണവും അവതരിപ്പിക്കുന്ന സംരംഭവുമാണ്. മഹാബലിയുടെ ജീവചരിത്രം നാം പഴയ കഥകളിലൂടെ അറിഞ്ഞതില്‍നിന്ന് വ്യത്യസ്തമായ രീതിയിലാണ് ഈ നോവലില്‍ അവതരിപ്പിച്ചിരിക്കുന്നത്. ഇത് നോവലിസ്റ്റിന്റെ കല്‍പന അല്ല, മറിച്ച് പഴയ വാമൊഴികളെ ആധുനിക ചിന്തകളിലേക്കും ചരിത്രത്തിന്റെ ഗഹനതയിലേക്കും നയിക്കുന്ന ഒരു ദാര്‍ശനിക സ്രോതസ്സാണ്. മഹാബലി ഭാരതീയ ചിന്തകളില്‍ ത്യാഗബോധത്തിന്റെ ഏറ്റവും ശക്തനായ പ്രതിനിധിയാണ്. ബലിപഥം ദേവാസുര യുദ്ധവും മഹാബലിയുടെ ജീവിതവും പുതിയ വീക്ഷണത്തില്‍ വിശകലനം ചെയ്യുന്നു. മഹാബലിയുടെ അഹംബോധം, ന്യായബോധം, വിശ്വാസങ്ങള്‍ എന്നിവയിലെ ദ്വന്ദങ്ങളും പുസ്തകത്തില്‍ നിറഞ്ഞുനി
ല്‍ക്കുന്നു.
മഹാബലിയുടെ ജീവിതകഥയില്‍ ദൈവങ്ങളും അസുരന്മാരും തമ്മിലുള്ള കലാപങ്ങളിലെ ധാര്‍മ്മിക പ്രതിസന്ധികള്‍ ഉജ്ജ്വല രചനാപാടവത്തോടെ ചിത്രീകരിച്ചിരിക്കുന്നു. മഹാബലിയുടെ പിതാവിനെ ദേവേന്ദ്രന്‍ ചതിയിലൂടെ വധിച്ചതും പിന്നീട് മഹാബലി തന്റെ വംശത്തെ സംരക്ഷിക്കാന്‍ നടത്തുന്ന പോരാട്ടവും നോവലില്‍ അവതരിപ്പിച്ചിരിക്കുന്നു.
വാമനാവതാരം, അതിന്റെ പുണ്യവും വഞ്ചനയും, മനുഷ്യ മനസില്‍ അഹംബോധത്തിന്റെ സ്വഭാവത്തെ തുറന്നുകാട്ടുന്നു. ഉപേന്ദ്രന്‍ എന്ന വാമനന്‍ മഹാബലിയുടെ ന്യായബോധത്തെ തകര്‍ത്തിടുമ്പോള്‍, ബലിപഥം ഒരു പുതിയ ദാര്‍ശനികരംഗം മുന്നോട്ട് വയ്‌ക്കുന്നു.
മഹാബലി കേരളം ഭരിച്ചിട്ടില്ലെന്ന് ഒരു പ്രമേയമായി ഉയര്‍ത്തുമ്പോള്‍, കേരളത്തിന്റെ ഓണക്കഥകളും മറ്റും പൊളിച്ചെഴുതുന്ന ഈ നോവല്‍, ചരിത്രത്തിന്റെ മറുവശങ്ങളും സാമൂഹിക വിചാരങ്ങളും വൈരുദ്ധ്യങ്ങള്‍ക്കിടയിലൂടെ കാണിക്കുന്നു.
മാതൃഭൂമി ബുക്‌സ് പ്രസിദ്ധീകരിച്ച ഈ കൃതി മലയാളസാഹിത്യത്തിലെ ചിന്താജനകവും വൈജ്ഞാനികവുമായ സംഭാവനകളില്‍ ഒന്നായി മാറുന്നു. ഐപിഎസുകാരിയായ ആര്‍. ശ്രീലേഖയുടെ ദാര്‍ശനിക പ്രകടനവും നവീകരണ വീക്ഷണവും ചേര്‍ന്ന് ബലിപഥം മികച്ച വായനാ സുഖം നല്കുന്നു. 660 രൂപയാണ് വില.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: