ന്യൂദല്‍ഹി : പാലക്കാട് ആര്‍എസ്എസ് പ്രവര്‍ത്തകന്‍ ശ്രീനിവാസനെ കൊലപ്പെടുത്തിയ കേസില്‍ പ്രതികള്‍ക്ക് ജാമ്യം നല്‍കിയതില്‍ ഹൈക്കോടതിക്ക് പിഴവ് പറ്റിയെന്ന് സുപ്രീം കോടതി.ഓരോ പ്രതിയുടെയും പങ്ക് പ്രത്യേകം പരിഗണിക്കണമായിരുന്നുവെന്നും 17 പ്രതികള്‍ക്ക് ഒരുമിച്ച് ജാമ്യം അനുവദിച്ചതില്‍ പിഴവുണ്ടായെന്നും സുപ്രീം കോടതി നിരീക്ഷിച്ചു.
ഹൈക്കോടതി കേസിലെ 17 പ്രതികള്‍ക്കും ഒരുമിച്ച് ജാമ്യം നല്‍കിയതിനെ ചോദ്യം ചെയ്ത് എന്‍ഐഎയാണ് സുപ്രീംകോടതിയെ സമീപിച്ചത്. ഇതിനു പുറമേ കേസില്‍ ഹൈക്കോടതി ജാമ്യം നിഷേധിച്ചവരും സുപ്രീംകോടതിയെ സമീപിച്ചിരുന്നുജാമ്യത്തിനെതിരെ എന്‍ഐഎ സമര്‍പ്പിച്ച ഹര്‍ജിയില്‍ സുപ്രീം കോടതി പ്രതികള്‍ക്ക് നോട്ടീസയച്ചു.
കേസില്‍ 9 പ്രതികള്‍ ഒഴികെ 17 പോപ്പുലര്‍ ഫ്രണ്ട- എസ്ഡിപിഐ പ്രവര്‍ത്തകര്‍ക്കാണ് ഹൈക്കോടതി ഉപാധികളോടെ ജാമ്യം അനുവദിച്ചത്.
ശ്രീനിവാസന്റെ കൊലപാതകത്തിന് പിന്നില്‍ ഗൂഢാലോചനയുണ്ട്.ജനാധിപത്യപരമായി തിരഞ്ഞെടുക്കപ്പെട്ട സര്‍ക്കാരിനെ അട്ടിമറിക്കുക എന്ന അജണ്ടയ്‌ക്ക് തടസം നില്‍ക്കുന്നവരെ ഉന്മൂലനം ചെയ്യുക എന്നതാണ് പോപ്പുലര്‍ ഫ്രണ്ടിന്റെ രീതി. ഇതിനായി തയാറാക്കിയ പട്ടികയില്‍ നിന്നാണ് ശ്രീനിവാസനെ കൊലപ്പെടുത്തിയതെന്നും എന്‍ഐഎ കോടതിയെ അറിയിച്ചു. ഭീകര പ്രവര്‍ത്തനം നടത്തുന്ന പല അന്താരാഷ്‌ട്ര സംഘടനകളുമായും പോപ്പുലര്‍ ഫ്രണ്ടിന് ബന്ധമുണ്ടെന്നും എന്‍ഐ എ ചൂണ്ടിക്കാട്ടി. ശ്രീനിവാസന്റെ കൊലപാതകവുമായി ബന്ധപ്പെട്ട വിഷയങ്ങള്‍ യുഎപിഎയുടെ പരിധിയില്‍വരുമെന്നും എന്‍ഐഎ വ്യക്തമാക്കി.
പോപ്പുലര്‍ ഫ്രണ്ട് പ്രവര്‍ത്തകരുടെ ജാമ്യാപേക്ഷ ഹൈക്കോടതി തള്ളി
പാലക്കാട് ശ്രീനിവാസന്‍ വധക്കേസില്‍ ജാമ്യം ലഭിക്കാതെ ജയിലിലുളള ഏഴ് പോപ്പുലര്‍ ഫ്രണ്ട് പ്രവര്‍ത്തകരുടെ ജാമ്യ അപേക്ഷ ഹൈക്കോടതി തള്ളി. പ്രതികള്‍ക്കെതിരെ പ്രഥമ ദൃഷ്ട്യാ തെളിവുണ്ടെന്നും കോടതി ചൂണ്ടിക്കാട്ടി.
ഇവര്‍ക്ക് ജാമ്യം നല്‍കിയാല്‍ കേസ് അട്ടിമറിക്കുമെന്ന പ്രോസിക്യൂഷന്‍ വാദം പരിഗണിച്ചാണ് ഉത്തരവ്.
പ്രതികരിക്കാൻ ഇവിടെ എഴുതുക: