കട്ടിങ് സൗത്ത് ആശയം പോപ്പുലർ ഫ്രണ്ടിൻ്റേത്; പ്രചാരകൻ സിദ്ദിഖ് കാപ്പൻ

ന്യൂദൽഹി:

oകട്ടിങ് സൗത്ത് ആശയ പ്രചരണം തുടങ്ങി വച്ചത് പോപ്പുലർ ഫ്രണ്ട് തീവ്രവാദി സിദ്ദിഖ് കാപ്പനാണെന്നതിന്റെ തെളിവുകൾ പുറത്ത്. 2018 മാർച്ച് 17 നു സിദ്ദിഖ് കാപ്പൻ ഫെയ്സ്ബുക്കിൽ പ്രസിദ്ധീകരിച്ച യുണൈറ്റഡ് സ്റ്റേറ്റ്സ് ഓഫ് സൗത്ത് ഇന്ത്യ മാപ്പ് തന്നെയാണ് പിന്നീട് കട്ടിങ് സൗത്തായി പരിണമിച്ചത്.
സിദ്ദിഖ് കാപ്പൻ ഡൽഹിയിൽ അഴിമുഖം ലേഖകനായിരിക്കെയാണ് ദക്ഷിണേന്ത്യൻ സംസ്ഥാനങ്ങളെ വിഭജിച്ചുള്ള മാപ്പ് സഹിതം ആശയ പ്രചാരണം തുടങ്ങിയത്.
2023 ൽ കട്ടിങ് സൗത്ത് പരിപാടിക്ക് ചുക്കാൻ പിടിച്ചത് അഴിമുഖം എഡിറ്ററും കോൺഫ്ലുവൻസ് മീഡിയ ചെയർമാനുമായ ജോസി ജോസഫാണ്.
ഹത്രാസ് യു എ പി എ കേസിൽ സിദ്ദിഖ് കാപ്പൻ ജയിലിലായപ്പോൾ നിരപരാധി പരിവേഷം ചാർത്താൻ കിണഞ്ഞു പരിശ്രമിച്ച ന്യൂസ്മിനിട്ട് എഡിറ്റർ ധന്യ രാജേന്ദ്രനും ന്യൂസ് ലൗൺട്രി എഡിറ്റർ അഭിനന്ദൻ സേക്രിയുമാണ് കട്ടിങ് സൗത്ത് ടീമിൽ ജോസിക്ക് ഒപ്പമുണ്ടായിരുന്നതെന്നും ശ്രദ്ധേയമാണ്.
പോപ്പുലർ ഫ്രണ്ട് സ്ഥാപക നേതാവ് പി.കോയയുടെ കുബുദ്ധിയാണ് കട്ടിങ് സൗത്ത് എന്നു ഐബിയും എൻ ഐ എ യും കാപ്പൻ – കോയ വാട്സാപ് ചാറ്റുകളിൽ നിന്നു മനസിലാക്കിയിരുന്നു. ഈ പ്രോജക്ടിന്റെ ചുമതല ജോസിയെ ഏൽപിക്കുന്ന കാര്യം കാപ്പൻ – കോയ ചാറ്റ് രേഖകളിലുണ്ട്.
സിദ്ദിഖ് കാപ്പൻ ജയിലിലായതോടെ മുടങ്ങിയ പ്രോജക്ട് കാപ്പനു ജാമ്യം കിട്ടിയതോടെ വീണ്ടും സജീവമാക്കുകയായിരുന്നു.