മഹാരാഷ്‌ട്രയിൽ സംഭവിച്ചത് തിരമാലയാണോ? കോൺഗ്രസിന്റെ എക്കാലത്തെയും മോശം പ്രകടനം : അതൃപ്തി അറിയിച്ച് മുൻ മുഖ്യമന്ത്രി

മുംബൈ: മഹാരാഷ്‌ട്രയിലെ പാർട്ടിയുടെ പരാജയം ഞെട്ടിപ്പിക്കുന്നതാണെന്നും സംസ്ഥാന നിയമസഭാ തെരഞ്ഞെടുപ്പിലെ എക്കാലത്തെയും മോശം തോൽവിയാണിതെന്നും പരിഭവം പറഞ്ഞ് മുതിർന്ന കോൺഗ്രസ് നേതാവും മഹാരാഷ്‌ട്ര മുൻ മുഖ്യമന്ത്രിയുമായ പൃഥ്വിരാജ് ചവാൻ.

സ്ത്രീകൾക്ക് ധനസഹായം നൽകുന്നതിനായി മഹായുതി സർക്കാരിന്റെ ലഡ്‌കി ബഹിൻ യോജന ഗ്രാമപ്രദേശങ്ങളിലെ വോട്ടർമാരിൽ ക്ലിക്ക് ചെയ്തെന്നും ഇത് സംസ്ഥാനത്തിന്റെ നഗരപ്രദേശങ്ങളിലെ പ്രതിപക്ഷമായ മഹാവികാസ് അഘാഡിയുടെ സാധ്യതകളെ സാരമായി ബാധിച്ചുവെന്നും ചവാൻ പറഞ്ഞു. തിരമാലയാണോ കൃത്രിമത്വമാണോ ഉണ്ടായതെന്ന് പറയാൻ പ്രയാസമാണെന്നും കാരാട് സൗത്ത് സീറ്റിൽ നിന്ന് പരാജയപ്പെട്ട ചവാൻ പറഞ്ഞു.

288 അംഗ സംസ്ഥാന നിയമസഭയിലേക്ക് നവംബർ 20ന് നടന്ന തെരഞ്ഞെടുപ്പിന്റെ ഫലം ശനിയാഴ്ചയാണ് പ്രഖ്യാപിച്ചത്. ചവാൻ ഉൾപ്പെടെ മഹാവികാസ് അഘാഡിയിൽ (എംവിഎ) നിന്നുള്ള നിരവധി വമ്പന്മാർ തോൽവിയുടെ രുചിയറിഞ്ഞു. എംവിഎയുടെ ഭാഗമായി 101 സീറ്റുകളിൽ മത്സരിച്ച കോൺഗ്രസ് 16 സീറ്റുകൾ മാത്രം നേടിക്കൊണ്ട് എക്കാലത്തെയും മോശം പരാജയമാണ് രേഖപ്പെടുത്തിയത്.

സത്താറ ജില്ലയിലെ കരാഡ് സൗത്ത് സീറ്റിൽ 5000 മുതൽ 6000 വരെ വോട്ടുകൾക്ക് വിജയിക്കുമെന്നാണ് ചവാൻ പറഞ്ഞത്. എന്നാൽ ജില്ലയിലെ എല്ലാ എംവിഎ നോമിനികളും ഏകദേശം 40,000 വോട്ടുകളുടെ വ്യത്യാസത്തിൽ പരാജയപ്പെട്ടുവെന്നും അദ്ദേഹം ചൂണ്ടിക്കാട്ടി.

ബിജെപിയുടെ അതുൽ ഭോസലെ കരാഡ് സൗത്തിൽ മുൻ മുഖ്യമന്ത്രിയെ 39,355 വോട്ടുകളുടെ ഭൂരിപക്ഷത്തിലാണ് പരാജയപ്പെടുത്തിയത്.