ന്യൂദൽഹി : പ്രധാനമന്ത്രി നരേന്ദ്ര മോദിയുടെ വികസന കാഴ്ചപ്പാടുകളുടെയും നയങ്ങളുടെയും ഫലമായാണ് മഹാരാഷ്‌ട്ര നിയമസഭാ തെരഞ്ഞെടുപ്പിലെ പാർട്ടിയുടെ ചരിത്രവിജയമെന്ന് ബിജെപി ദേശീയ ജനറൽ സെക്രട്ടറി തരുൺ ചുഗ്. ഹരിയാനയിലെ പാർട്ടിയുടെ സമീപകാല വിജയത്തിന് ശേഷം മഹാരാഷ്ട്രയിലെ വൻ വിജയം 2047ലെ വികസിത ഇന്ത്യ വീക്ഷണത്തിനുള്ള ജനങ്ങളുടെ പിന്തുണയെ സ്ഥിരീകരിക്കുന്നുവെന്നും ചുഗ് പറഞ്ഞു.
മഹാരാഷ്‌ട്ര നിയമസഭാ തെരഞ്ഞെടുപ്പിലെ മഹായുതിയുടെ വൻ വിജയം അഭൂതപൂർവമായ വിജയമായാണ് അദ്ദേഹം വിശേഷിപ്പിച്ചത്. ഈ ഫലങ്ങൾ ചരിത്രപരമാണ്, ഇവിടെ കോൺഗ്രസ് സഖ്യം 50 സീറ്റിൽ മാത്രം ഒതുങ്ങി. മഹാരാഷ്‌ട്രയിൽ കോൺഗ്രസിന്റെ നേതൃത്വത്തിലുള്ള സഖ്യത്തെ ജനങ്ങൾ പൂർണമായും തള്ളിക്കളഞ്ഞുവെന്നും അദ്ദേഹം പറഞ്ഞു.
കൂടാതെ ഉത്തർപ്രദേശ് ഉപതെരഞ്ഞെടുപ്പിൽ ബിജെപിയുടെ മികച്ച പ്രകടനത്തെ പരാമർശിച്ച ചുഗ് ഉപതെരഞ്ഞെടുപ്പിൽ ഉത്തർപ്രദേശിൽ ബിജെപി മികച്ച വിജയം നേടിയെന്നും ഭൂരിപക്ഷത്തിന് പിന്നിലുള്ള സീറ്റുകളിലും ബിജെപിയുടെ വോട്ട് വിഹിതം വർദ്ധിച്ചതായും പറഞ്ഞു. ബിഹാറിലും അസമിലും നടന്ന ഉപതെരഞ്ഞെടുപ്പുകളിൽ മിക്കവാറും എല്ലാ സീറ്റുകളും ബിജെപി നേതൃത്വത്തിലുള്ള എൻഡിഎ സഖ്യം നേടിയിട്ടുണ്ട്.
രാജ്യത്തെ ജനങ്ങൾ മോദിയുടെ വികസന നയങ്ങൾ അംഗീകരിച്ചു. ദരിദ്ര ക്ഷേമം, യുവാക്കൾ, സ്ത്രീകൾ, കർഷക ക്ഷേമം എന്നീ നയങ്ങളെ പൊതുജനങ്ങൾ സ്വീകരിച്ചു. 14 സംസ്ഥാനങ്ങളിലെ ഉപതെരഞ്ഞെടുപ്പുകളിൽ ബിജെപി നേതൃത്വത്തിലുള്ള എൻഡിഎ സഖ്യത്തിന് 29 സീറ്റുകളും ലഭിച്ചു. എല്ലാ സംസ്ഥാനങ്ങളിലും വോട്ട് ശതമാനവും വർദ്ധിച്ചുവെന്നും ചുഗ് കൂട്ടിച്ചേർത്തു.
