മൂവാറ്റുപുഴ : ഭാര്യയെ കുത്തികൊലപ്പെടുത്താൻ ശ്രമിച്ച ഭർത്താവിനെ മണിക്കൂറുകൾക്കുള്ളിൽ പോലീസ് പിടികൂടി. തൊടുപുഴ മുതലക്കോടത്തിന് സമീപം ഇടവെട്ടി കൊതകുത്തി ഭാഗത്ത്‌ പാണവേലിൽ വീട്ടിൽ മനോജ്‌ കുഞ്ഞപ്പനെയാണ് മൂവാറ്റുപുഴ പോലീസ് പിടികൂടിയത്.
അമ്പലംപടി ഭാഗത്ത്‌ വച്ചാണ് ഭാര്യയെ കത്തികൊണ്ട് കുത്തികൊലപ്പെടുത്താൻ ഇയാൾ ശ്രമിച്ചത്. നെഞ്ചിനും കാലിനും ഗുരുതരമായി പരുക്കേറ്റ വീട്ടമ്മ കോട്ടയം മെഡിക്കൽ കോളേജിൽ അത്യാഹിതവിഭാഗത്തിൽ ചികിത്സയിലാണ്.
സംഭവത്തിന് ശേഷം ഇയാൾ സ്വന്തം സ്കൂട്ടറിൽ ഒളിവിൽ പോയി. പ്രതിയെ പിടികൂടാൻ രൂപീകരിച്ച അന്വേഷണ സംഘം ശാസ്ത്രീയ അന്വേഷണം നടത്തി മണിക്കൂറുകൾക്കകം പിടികൂടി. ഭാര്യയെ അസഭ്യം പറഞ്ഞതിനും മർദിച്ചതിനും 2021ൽ മൂവാറ്റുപുഴ സ്റ്റേഷനിൽ ഇയാൾക്കെതിരെ കേസുണ്ട്.
ഡിവൈഎസ്പി വി ടി ഷാജന്റെ മേൽനോട്ടത്തിലുള്ള അന്വേഷണസംഘത്തിൽ ഇൻസ്പെക്ടർ എസ്. ജയകൃഷ്ണൻ, എസ്ഐമാരായ വിഷ്ണു രാജു, എം വി ദിലീപ്കുമാർ, പി സി ജയകുമാർ, ബിനോ ഭാർഗവൻ, സീനിയർ സിവിൽ പോലീസ് ഓഫീസർമാരായ ബിബിൽ മോഹൻ, രഞ്ജിത് രാജൻ എന്നിവരാണ് ഉണ്ടായിരുന്നത്.
പ്രതികരിക്കാൻ ഇവിടെ എഴുതുക