ചെന്നൈ: സമ്മേളനത്തില് പങ്കെടുക്കുന്നവര്ക്ക് ഇരിക്കുന്ന കസേര ഫ്രീ. ഇതറിഞ്ഞതോടെ രാഷ്ട്രീയം എന്തെന്നറിയാത്തവര് പോലും കുടുംബസമേതം സമ്മേളനത്തിന് എത്തി. സമ്മേളനം തീരുന്നത് വരെ കസേരയില് അള്ളിപ്പിടിച്ചിരുന്നു. വേദിയില് പ്രസംഗം തകര്ക്കുമ്പോള് തങ്ങളുടെ കസേര ആരെങ്കിലും അടിച്ചുമാറ്റമോ എന്ന ഭീതിയിലായിരുന്നു സദസ്സിലിരുന്നവര്.സമ്മേളനം തീര്ന്നതോടെ കസേരയും തലയിലേറ്റി വീട്ടിലേക്ക് കുതിച്ചു.
തമിഴ്നാട്ടില് അണ്ണാ ഡിഎംകെയുടെ 53ാം വാര്ഷികാഘോഷത്തിലായിരുന്നു ആളെ കൂട്ടാന് സംഘാടകര് ഇരിക്കുന്ന കസേര ഓഫര് ചെയ്തത്. പെരുമാനല്ലൂരില് എംജിആര് യുവജന വിഭാഗമാണ് പരിപാടി സംഘടിപ്പിച്ചത്.
സമ്മേളനം വിജയിപ്പിക്കാനും തെരഞ്ഞെടുപ്പില് ജയിക്കാനുമായി ഇത്തരം ഒട്ടേറെ ഓഫറുകള് കണ്ടിട്ടുള്ള തമിഴകം ഇരിക്കുന്ന കസേര കിട്ടുമെന്ന് ആദ്യമായാണ് മനസ്സിലാക്കുന്നത്.മറ്റു കക്ഷികളും ഇത്തരം ഓഫറുകളുമായി രംഗത്തെത്തുമെന്ന് പ്രതീക്ഷയിലാണ് തമിഴ് നാട്ടുകാര്.
