തിരുവനന്തപുരം: കേരള സ്റ്റേറ്റ് ലൈബ്രറി കൗണ്സിലിന്റെ 2023 ലെ വിവിധ പുരസ്കാരങ്ങള് പ്രഖ്യാപിച്ചു. സാഹിത്യരംഗത്തെ സമഗ്രസംഭാവനയ്ക്കുള്ള ഐ.വി. ദാസ് പുരസ്കാരത്തിന് പ്രൊഫ. എം. ലീലാവതി തെരഞ്ഞെടുക്കപ്പെട്ടു. ഒരു ലക്ഷം രൂപയും പ്രശസ്തിപത്രവും വെങ്കല ശില്പവും അടങ്ങുന്നതാണ് പുരസ്കാരം. സംസ്ഥാനത്തെ ഏറ്റവും നല്ല ഗ്രന്ഥശാലാ പ്രവര്ത്തകനുള്ള 50,000 രൂപയും പ്രശസ്തിപത്രവും ശില്പവും അടങ്ങുന്ന പി.എന്. പണിക്കര് പുരസ്കാരത്തിന് പൊന്കുന്നം സെയ്ദും തെരഞ്ഞെടുക്കപ്പെട്ടു.
50 വര്ഷം പിന്നിട്ട ഏറ്റവും മികച്ച ഗ്രന്ഥശാലയ്ക്കുള്ള ഇഎംഎസ് പുരസ്കാരത്തിന് കൊല്ലം കാട്ടാമ്പള്ളി സന്മാര്ഗദായിനിയുവജന ഗ്രന്ഥശാല അര്ഹമായി. പിന്നാക്ക പ്രദേശത്ത് ഏറ്റവും മികച്ച പ്രവര്ത്തനം നടത്തുന്ന ഗ്രന്ഥശാലയ്ക്കുള്ള പുരസ്കാരം വയനാട് കണ്ണങ്കോട് നവോദയ ഗ്രന്ഥശാല നേടി. മികച്ച സാംസ്കാരിക പ്രവര്ത്തനം നടത്തുന്ന ഗ്രന്ഥശാലയ്ക്കുള്ള സമാധാനം പരമേശ്വരന് പുരസ്കാരം കാസര്കോട് ജില്ലയിലെ പൊള്ളപ്പൊയില് ബാലകൈരളി ഗ്രന്ഥശാലയ്ക്കാണ്.
