മുതിർന്ന ബിജെപി നേതാവും മൂന്ന് തവണ എംപിയുമായിരുന്ന ഹരിശ്ചന്ദ്ര ചവാൻ അന്തരിച്ചു

നാസിക് : മഹാരാഷ്‌ട്രയിലെ മുതിർന്ന ബിജെപി നേതാവും മൂന്ന് തവണ ലോക്‌സഭ എംപിയുമായിരുന്ന ഹരിശ്ചന്ദ്ര ചവാൻ അന്തരിച്ചു. നാസികിലെ വസതിയിൽ വ്യാഴാഴ്ച പുലർച്ചെ ആറ് മണിയോടെയായിരുന്നു അദ്ദേഹം അന്തരിച്ചത്. 74 വയസ്സായിരുന്നു.

ഏറെ നാളായി അസുഖബാധിതനായ ചവാനെ ദിവസങ്ങൾക്ക് മുമ്പാണ് സ്വകാര്യ ആശുപത്രിയിൽ പ്രവേശിപ്പിച്ചത്. മൂന്ന് തവണ പാർലമെൻ്റ് അംഗമായിരുന്നു ചവാൻ. 2004ൽ മലേഗാവ് ലോക്‌സഭാ സീറ്റിൽ നിന്നും 2009ലും 2014ലും നാസിക് ജില്ലയിലെ ദിൻഡോരി മണ്ഡലത്തിൽ നിന്നും ബിജെപി ടിക്കറ്റിൽ വിജയിച്ചു. കൂടാതെ സംസ്ഥാനത്ത് എംഎൽഎയായും അദ്ദേഹം പ്രവർത്തിച്ചിട്ടുണ്ട്.

സംസ്കാരം വൈകിട്ട് ജില്ലയിലെ സുർഗാന താലൂക്കിലെ പ്രതാപ്ഗഢ് ഗ്രാമത്തിൽ നടക്കും. അദ്ദേഹത്തിന്റെ നിര്യാണത്തിൽ സംസ്ഥാന ബിജെപി നേതാക്കൾ അനുശോചനം രേഖപ്പെടുത്തി.