കൊച്ചി: സംസ്ഥാന ബിവേറജേഴ്സ് കോര്പ്പറേഷന്(ബെവ്കോ)യിലെ വനിതാ ജീവനക്കാര്ക്ക് സ്വയം പ്രതിരോധ പരിശീലനം നല്കുന്നു.ബെവ്കോയിലെ 1600 ഓളം വരുന്ന വനിത ജീവനക്കാര്ക്ക് കേരള പൊലീസിലെ വനിത സ്വയം പ്രതിരോധ സേന ഉദ്യോഗസ്ഥരാണ് ഡ്രൈ ഡേയായ ഡിസംബര് ഒന്നിന് പരിശീലനം നല്കുന്നത്.
ഔട്ട്ലെറ്റുകളിലെ വനിതാ ജീവനക്കാര്ക്കുനേരേ അക്രമങ്ങള് ഉണ്ടാകുന്നത് തടയുക ലക്ഷ്യമിട്ടാണ് പരിശീലനം. ഒരു ദിവസം നീണ്ടു നില്ക്കുന്ന പരിശീലനത്തിലൂടെ പ്രാഥമിക സ്വയം പ്രതിരോധ മാര്ഗങ്ങളാണ് പരിശീലിപ്പിക്കുന്നത്.
14 ജില്ലകളിലെയും ബിവറേജസ് ഷോപ്പുകള്, വെയര് ഹൗസുകള്, ഓഫീസുകള് എന്നിവിടങ്ങളിലെ ജീവനക്കാരികളാണ് ബെവ്കോയുടെ ജില്ല ആസ്ഥാനങ്ങളില് നടക്കുന്ന സ്വയം പ്രതിരോധ പരിശീലന ക്ലാസുകളില് പങ്കെടുക്കുക. ഓരോ ജില്ലയില് നിന്നും 145 വനിത ജീവനക്കാര് ക്ലാസില് പങ്കെടുക്കും.
ബെവ്കോ ആസ്ഥാനത്തെ വനിതകള്ക്കായി ഡിസംബര് 18 നാണ് സ്വയം പ്രതിരോധ പരിശീലന ക്ലാസ് സംഘടിപ്പിച്ചിട്ടുളളത്. ഡിസംബര് ഒന്നിലെ ക്ലാസില് പങ്കെടുക്കുന്നവര്ക്ക് രണ്ടു മാസത്തിനുള്ളില് കോംപന്സേറ്ററി ഓഫ് എടുക്കാനാകും. ഗര്ഭിണികള്, ശാരീരിക ബുദ്ധിമുട്ടുളളവര് എന്നിവര് പരിശീലനം കണ്ട് മനസിലാക്കിയാല് മതി.
ആയോധനകലകളില് പ്രാവീണ്യമുള്ള നാല് വനിതാ പൊലീസുകാരെ എല്ലാ ജില്ലകളിലും പരിശീലനത്തിനായി നിയോഗിച്ചിട്ടുണ്ട്.
