കോഴിക്കോട്:ഗര്ഭിണിയായ ഭാര്യയെ കുത്തിപ്പരിക്കേല്പ്പിച്ച കേസിലെ പ്രതി മുംബയ് വിമാനത്താവളത്തില് പിടിയിലായി. നാദാപുരം കല്ലാച്ചിയില് ഭാര്യയെ കൊലപ്പെടുത്താന് ശ്രമിച്ച കേസില് ഭര്ത്താവ് ചിയ്യൂര് താനമഠത്തില് ഫൈസലിനെയാണ് വിദേശത്തേക്ക് കടക്കാനുള്ള ശ്രമത്തിനിടെ അറസ്റ്റ് ചെയ്തത്.
തിങ്കളാഴ്ചയായിരുന്നു കേസിന് ആധാരമായ സംഭവം. രണ്ട് മാസം ഗര്ഭിണിയായ നരിപ്പറ്റ കിണറുള്ള പറമ്പത്ത് ഷംനയെ(27) വീട്ടില് വെച്ച് ചിരവ കൊണ്ട് കുത്തിപ്പരിക്കേല്പ്പിക്കുകയായിരുന്നു. ഇടത് വയറിലും കൈക്കും പരിക്കേറ്റ ഷംന ആശുപത്രിയിലാണ്. നിലവിളി കേട്ട് ഓടിയെത്തിയ അയല്വാസികളാണ് യുവതിയെ ആശുപത്രിയില് എത്തിച്ചത്. സംഭവത്തിന് ശേഷം ഫൈസല് ഒളിവില് പോയി.
ഷംന അപകടനില തരണം ചെയ്തതായി ഡോക്ടര്മാര് അറിയിച്ചു.സ്വത്ത് സംബന്ധമായ തര്ക്കമാണ് ആക്രമണത്തിന് പിന്നിലെന്നാണ് വിവരം. ഭാര്യയുടെ പേരില് വയനാട്ടിലും മറ്റുമുള്ള സ്വത്തുക്കള് തന്റെ പേരിലേക്ക് മാറ്റണമെന്ന് ആവശ്യപ്പെട്ട് ഫൈസല് നിരന്തരം ഷംനയെ ഉപദ്രവിച്ചിരുന്നതായി സഹോദരന് പൊലീസിന് മൊഴി നല്കി. ഫൈസലിന്റെ പേരില് വധശ്രമത്തിന് ഉള്പ്പെടെ കേസ് രജിസ്റ്റര് ചെയ്തു.
