കണ്ണൂര്‍: ഉപതെരഞ്ഞെടുപ്പുകളിലെ ഫലം സംസ്ഥാന സര്‍ക്കാരിനെ ബാധിക്കില്ലെന്നും കണ്ണൂരിലെ പാര്‍ട്ടിയുടെ അഭിപ്രായം പറയേണ്ടത് താനല്ല എം.വി. ജയരാജനാണെന്നും സിപിഎം കേന്ദ്ര കമ്മിറ്റിയംഗം ഇ.പി. ജയരാജന്‍. കണ്ണൂരില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
എഡിഎം കൈക്കൂലി വാങ്ങിയിട്ടുണ്ടോ, ഇല്ലയോയെന്ന് ജയരാജന്‍ പറഞ്ഞിട്ടുണ്ടെങ്കില്‍ നിങ്ങള്‍ അദ്ദേഹത്തോട് ചോദിക്കണം. എല്ലാ കാര്യങ്ങളിലും പ്രതികരിക്കുന്നയാളാണ് ജയരാജന്‍. ഇവിടെ നിന്ന് പാര്‍ട്ടി ഓഫീസിലേക്ക് അത്ര ദൂരമല്ലേയുള്ളു. നിങ്ങള്‍ക്ക് പോയി ചോദിക്കാം, നടന്നത് എന്താണെന്ന്. ഓരോ നേതാക്കളും ഓരോന്ന് പറയുന്നത് കമ്യൂണിസ്റ്റ് പാര്‍ട്ടി രീതിയല്ല. പാര്‍ട്ടിയുടെ അഭിപ്രായം ഈ കാര്യത്തില്‍ എം.വി. ജയരാജന്‍ പറഞ്ഞു കഴിഞ്ഞു. അതില്‍ തനിക്കൊന്നും പറയാനില്ല. നവീന്‍ ബാബുവിന്റെ മരണത്തില്‍ കണ്ണൂരിലെയും പത്തനംതിട്ടയിലെയും ജില്ലാ കമ്മറ്റികള്‍ക്ക് വ്യത്യസ്ത അഭിപ്രായമില്ല. ഈ കാര്യത്തില്‍ ഒരേ അഭിപ്രായമേ പാര്‍ട്ടിക്കുള്ളൂ. ചേലക്കരയിലും പാലക്കാട്ടെയും ഉപതെരഞ്ഞെടുപ്പുകളെ കുറിച്ച് താന്‍ കണ്ണൂരില്‍ നിന്ന് അഭിപ്രായം പറയുന്നത് ശരിയല്ല. ജനവിധി എന്തായാലും സംസ്ഥാന സര്‍ക്കാരിനെ ബാധിക്കില്ല. 138 മണ്ഡലങ്ങളിലെയും ജനവിധി രണ്ട് ഉപതെരഞ്ഞെടുപ്പുകളുമായി സാമാന്യവല്‍കരിക്കാന്‍ കഴിയില്ല. ചേലക്കരയില്‍ എല്‍ഡിഎഫ് പാട്ടുംപാടി ജയിക്കും. ജയരാജന്‍ പറഞ്ഞു.
പ്രതികരിക്കാൻ ഇവിടെ എഴുതുക: