ചേലക്കര: അന്തിമഹകാളന് കാവിലെ വെടിക്കെട്ട് നടത്തിക്കാന് വേണ്ട ഇടപെടല് ഉണ്ടാകണമെന്ന് ആവശ്യപ്പെട്ട് വേല കമ്മറ്റി ഭാരവാഹികള് കേന്ദ്ര മന്ത്രി സുരേഷ് ഗോപി
യ്ക്ക് നിവേദനം നല്കിയ സാഹചര്യത്തില് അടുത്ത വര്ഷം വെടിക്കെട്ട് നടത്തിക്കുന്നതിന് ബിജെപി പ്രഥമ പരിഗണന നല്കുമെന്ന് ജില്ലാ പ്രസിഡന്റ്് അഡ്വ. കെ.കെ അനീഷ് കുമാര് പറഞ്ഞു. തണ്ണീര്ത്തട സംരക്ഷണ നിയമത്തിന്റെ മറപറ്റി പെര്മനന്റ് മാഗസിന് നിര്മ്മാണത്തിന് സംസ്ഥാന സര്ക്കാര് തടയിടുകയാണ്.
ആയിരക്കണക്കിന് ഹെക്ടര് നെല്വയല് നികത്താന് ഭൂമാഫിയകള്ക്ക് കേരളം മുഴുവന് അനുമതി നല്കിയ സംസ്ഥാന സര്ക്കാര് വെടിപ്പുര നിര്മ്മാണത്തിന് 5 സെന്റ് വയല് നികത്താന് അനുമതി നല്കാത്തത് വിരോധാഭാസമാണ്. വേല മുടക്കണമെന്ന കൃത്യമായ പദ്ധതിയാണ് രണ്ട് വര്ഷമായി സിപിഎം നടപ്പാക്കുന്നത്. അടുത്ത വര്ഷം വേല കമ്മറ്റി ഭാരവാഹികള്ക്കൊപ്പം നിന്ന് ബിജെപി ഈ ഗൂഡാലോചനയെ തകര്ക്കും. വെടിക്കെട്ട് നടത്തിപ്പിന് പെസോയുടെ തടസ്സങ്ങള് മൂലമല്ല കഴിഞ്ഞ വര്ഷങ്ങളില് വെടിക്കെട്ട് മുടങ്ങിയത്. വരും വര്ഷവും പെസോയുടെ ഭാഗത്ത് നിന്ന് തടസ്സങ്ങള് ഇല്ലാതെ നോക്കുമെന്ന് കേന്ദ്രമന്ത്രി സുരേഷ് ഗോപി ഉറപ്പ് നല്കിയിട്ടുണ്ടെന്നും അനീഷ്കുമാര് പറഞ്ഞു.
