കഴിഞ്ഞ അമേരിക്കന്‍ തെരഞ്ഞെടുപ്പില്‍ ഡൊണാള്‍ഡ് ട്രംപ് തോറ്റപ്പോള്‍, ഇവിടെ അത് നരേന്ദ്ര മോദിയുടെ തോല്‍വിയായി ആഘോഷിച്ചവരുണ്ട്. ഇടതുപക്ഷവും മതതീവ്രവാദികളും അവരുടെ വിജയം പോലെയാണ് ട്രംപിന്റെ തോല്‍വിയെ കണ്ടത്. മോദിയുമായി ഏറ്റവും അടുത്ത സൗഹൃദം പുലര്‍ത്തിയിരുന്ന അമേരിക്കന്‍ പ്രസിഡന്റ് എന്നതായിരുന്നു അദ്ദേഹത്തിന്റെ തോല്‍വി ആഘോഷമാക്കാന്‍ പലരേയും പ്രേരിപ്പിച്ചത്. ഇടവേളയ്‌ക്ക് ശേഷം പ്രസിഡന്റ് സ്ഥാനത്ത് ട്രംപ് തിരിച്ചെത്തുന്നു. അതും പൂര്‍വാധികം ശക്തനായിത്തന്നെ. ആഗോള രാഷ്‌ട്രീയത്തില്‍ പുതിയ വഴിത്തിരിവിന് അടിത്തറയിടുകയാണ് ഡൊണാള്‍ഡ് ട്രംപിന്റെ രണ്ടാം വരവ്.
ട്രംപിന്റെ വിജയം ഭാരതത്തിന് വെല്ലുവിളികളും അവസരങ്ങളും ഒരുപോലെ നല്‍കുന്നു. ട്രംപിന്റെ നയങ്ങള്‍ നമ്മുടെ സമ്പദ് വ്യവസ്ഥ, സുരക്ഷാ താത്പര്യങ്ങള്‍, രാഷ്‌ട്രീയ ബന്ധങ്ങള്‍ എന്നിവയെ എങ്ങനെ ബാധിക്കും എന്നത് നിര്‍ണായകമാണ്. പ്രതിരോധ സഹകരണത്തിനും ആഗോള നയരൂപീകരണത്തിനും മൂല്യവത്തായ അനുകൂലഘടകങ്ങള്‍ നല്‍കുന്നുണ്ടെങ്കിലും, സാമ്പത്തിക അനിശ്ചിതത്വം, കുടിയേറ്റ നിയന്ത്രണം തുടങ്ങിയവയില്‍ ട്രംപിന്റെ നിലപാട് നിര്‍ണായകമാവും.
ട്രംപിന്റെ മുന്‍കാല ഭരണകാലത്ത് ഭാരതവും യുഎസും തമ്മിലുള്ള പ്രതിരോധ ബന്ധം ശക്തമായി മുന്നേറിയിരുന്നു. ഇതില്‍ പ്രധാനമായിരുന്നു ആയുധ കരാറുകളും ജപ്പാനും ഓസ്‌ട്രേലിയയും ഉള്‍പ്പെടുന്ന ക്വാഡ് മുതലായ സംരംഭങ്ങളിലൂടെ സൈനിക സഹകരണം വളര്‍ത്തിയെടുക്കലും. ചൈനയുടെ പ്രഭാവം ചെറുക്കുന്നതില്‍ ട്രംപ് താത്പര്യം തുടരുകയാണെങ്കില്‍, ഭാരതവുമായുള്ള പ്രതിരോധ സഹകരണത്തില്‍ മുന്നോട്ട് പോകാന്‍ സാധ്യതയുണ്ട്.
‘അമേരിക്ക ഫസ്റ്റ്’ എന്ന ട്രംപിന്റെ നയം, അമേരിക്കന്‍ തൊഴിലുകള്‍ക്കും വ്യവസായങ്ങള്‍ക്കും മുന്‍ഗണന നല്‍കുന്ന തരത്തിലാണ്. ഇതിന്റെ ഫലമായി, നമ്മുടെ കയറ്റുമതിയെ ബാധിക്കുന്ന കര്‍ശനമായ വ്യാപാര പ്രക്രിയകളും തീരുവകളും വരാനിടയുണ്ട്. ആദ്യകാല ഭരണത്തില്‍ ട്രംപ് സമാനമായ തീരുവകള്‍ ചുമത്തുകയും ആഗോള വ്യാപാര കരാറുകള്‍ അമേരിക്കയുടെ ആശയത്തിന് അനുസൃതമാക്കി പുനഃസംഘടിപ്പിക്കുകയും ചെയ്തിരുന്നു. ഇതിന്റെ തുടര്‍ച്ചയില്‍, ഐടി സേവനങ്ങള്‍, ഫാര്‍മസ്യൂട്ടിക്കല്‍സ്, വസ്ത്ര വ്യവസായം തുടങ്ങിയ കയറ്റുമതിയില്‍ ആശ്രയിക്കുന്ന മേഖലകള്‍ക്ക് സവിശേഷ വെല്ലുവിളികള്‍ നേരിടേണ്ടി വരും.
ഇമിഗ്രേഷന്‍ നയങ്ങളും നിര്‍ണായകമാവും. മുന്‍കാലത്ത്, വിദഗ്ധ തൊഴിലാളികളുടെ വിസകളില്‍ കര്‍ശന നിയന്ത്രണങ്ങള്‍ കൊണ്ടുവന്നത് ഐടി മേഖലയെയും വിദേശ തൊഴിലാളികളെയും ബാധിച്ചിരുന്നു. ഈ നയങ്ങള്‍ വീണ്ടും കടുപ്പിച്ചാല്‍, അമേരിക്കയില്‍ പ്രവര്‍ത്തിക്കുന്ന കമ്പനികള്‍ക്കും വിദേശത്തു ജോലി തേടുന്ന പ്രൊഫഷണലുകള്‍ക്കും അത് പ്രതിസന്ധി സൃഷ്ടിക്കാനിടയുണ്ട്. ഭാരത-അമേരിക്കന്‍ സമൂഹം യുഎസിലെ ഏറ്റവും സ്വാധീനമുള്ള കുടിയേറ്റ സമൂഹങ്ങളിലൊന്നാണ്. ട്രംപിന്റെ അഭ്യന്തര നയങ്ങളില്‍, കുടിയേറ്റ സമൂഹത്തെ ബാധിക്കുന്ന നയങ്ങള്‍ക്ക് സാധ്യതയുണ്ടായാല്‍, ഇവരുടെ രാഷ്‌ട്രീയ പ്രവര്‍ത്തനവും അവകാശ സംരക്ഷണവും കൂടുതല്‍ സജീവമാകാനിടയുണ്ട്.
ട്രംപിന്റെ വിദേശ നയങ്ങള്‍ പലപ്പോഴും വ്യാപാരപരവും അന്താരാഷ്‌ട്ര സംഘടനകളോട് വെല്ലുവിളി നിലപാട് സ്വീകരിക്കുന്നതുമായാണ് അറിയപ്പെടുന്നത്. ഇത്തരത്തിലുള്ള നയങ്ങള്‍ പുനഃപരിശോധിക്കുമ്പോള്‍ ഉണ്ടാകാവുന്ന പുതിയ പ്രതിസന്ധികള്‍ നമുക്ക് ആഗോളതലത്തില്‍ സ്വാധീനമുണ്ടാക്കാനുള്ള അവസരങ്ങളും നല്‍കാം. അതേസമയം യുഎസ് നിലപാടുകളുമായി പൊരുത്തപ്പെടുകയോ അതിനെ മറികടക്കുകയോ ചെയ്യാനുള്ള പുതിയ നയരൂപീകരണങ്ങള്‍ ആവശ്യമാകും.
ആശങ്കപ്പെടുത്തുന്ന ഒരു പ്രധാന മേഖല കാലാവസ്ഥാ നയമാണ്. പാരീസ് കരാറില്‍ നിന്ന് യുഎസ് പിന്മാറിയതിലൂടെ, ട്രംപിന്റെ നയങ്ങള്‍ മുന്‍കാലത്ത് കാലാവസ്ഥാ നടപടികള്‍ക്ക് തടസ്സം സൃഷ്ട്ടിച്ചിരുന്നു. ട്രംപ് വീണ്ടും സമാനമായ നയങ്ങള്‍ സ്വീകരിക്കുമോ എന്നാണ് കാത്തിരുന്നു കാണേണ്ടത്.
പ്രതികരിക്കാൻ ഇവിടെ എഴുതുക