കൊല്ലം:യാത്രക്കാര്‍ക്ക് ഭക്ഷണം കഴിക്കാനും ചായ കുടിക്കാനുമായി കെഎസ്ആര്‍ടിസിയുടെ ദീര്‍ഘദൂര സര്‍വീസുകള്‍ ഇനി നിശ്ചയിച്ചിട്ടുളള ഹോട്ടലുകളില്‍ മാത്രമേ നിര്‍ത്താവൂ എന്ന് നിര്‍ദ്ദേശം.
ഇത്തരത്തില്‍ 24 ഇടത്താവളങ്ങളാണ് സംസ്ഥാനത്ത് കെഎസ്ആര്‍ടിസി മാനേജ്‌മെന്റ് അംഗീകരിച്ച് നിര്‍ദ്ദേശിച്ചിട്ടുള്ളത്. കായംകുളത്തിനടുത്ത് കെടിഡിസിയുടെ ആഹാര്‍ ഹോട്ടലും ഈ പട്ടികയിലുണ്ട്. മറ്റ് 23 എണ്ണം സ്വകാര്യ ഹോട്ടലുകളാണ്.
നിലവില്‍ ജീവനക്കാരുടെ താത്പര്യാനുസരണമുളള ഹോട്ടലുകളിലാണ് ജീവനക്കാര്‍ ഇടത്താവളമായി ബസ് നിര്‍ത്തിയിരുന്നത്.ഇത്തരം ഹോട്ടലുകളെക്കുറിച്ച് യാത്രക്കാര്‍ പരാതിപ്പെട്ടിരുന്നു. പരാതികളുടെ അടിസ്ഥാനത്തില്‍ സമഗ്ര പഠനം നടത്തി താല്പര്യപത്രം ക്ഷണിച്ചതിന്റെ അടിസ്ഥാനത്തിലാണ് പുതിയ ഇടത്താവളങ്ങള്‍ നിശ്ചയിച്ചിരിക്കുന്നത്.
ദീര്‍ഘദൂര ബസുകളില്‍ ഇടത്താവളങ്ങളുടെ പേരും നിര്‍ത്തുന്നസമയവും യാത്രക്കാര്‍ കാണുംവിധം എഴുതി വയ്‌ക്കും.പ്രഭാതഭക്ഷണത്തിന് രാവിലെ 7.30 മുതല്‍ 9 വരെയും ഉച്ചഭക്ഷണത്തിന് 12.30 മുതല്‍ 2 വരെയും ചായ, ലഘുഭക്ഷണം എന്നിവയ്‌ക്ക് 4 മുതല്‍ 6 വരെയും രാത്രി ഭക്ഷണത്തിന് 8 മുതല്‍ 11 വരെയുമാണ് സമയം നിശ്ചയിച്ചിട്ടുളളത്.
അന്തര്‍ സംസ്ഥാനപാതകളില്‍ രണ്ടിടത്താണ് ഇടത്താവളങ്ങള്‍. സംസ്ഥാന ഹൈവേകളില്‍ മൂന്നിടത്തും. മെയിന്‍ സെന്‍ട്രല്‍ (എംസി) റോഡില്‍ ഏഴിടത്തും ദേശീയപാതയില്‍ 12 ഇടത്തുമാണ് ഇടത്താവളങ്ങള്‍. കെഎസ്ആര്‍ടിസി ഡിപ്പോകളിലെ കാന്റീനുകള്‍ നിലവിലെ പോലെ പ്രവര്‍ത്തിക്കും.
ഹോട്ടലുകളും സ്ഥലവും
1. ലേ അറേബ്യ കുറ്റിവട്ടം, കരുനാഗപ്പള്ളി
2. പന്തോറ വവ്വാക്കാവ്, കരുനാഗപ്പള്ളി
3. ആദിത്യ ഹോട്ടല്‍ നങ്ങ്യാര്‍കുളങ്ങര, കായംകുളം
4കെടിഡിസി ആഹാര്‍ ഓച്ചിറ, കായംകുളം
5. അവീസ് പുട്ട് ഹൗസ് പുന്നപ്ര, ആലപ്പുഴ
6. റോയല്‍ 66 കരുവാറ്റ, ഹരിപ്പാട്
7 ഇസ്താംബുള്‍ തിരുവമ്പാടി, ആലപ്പുഴ
8. ആര്‍ആര്‍ മതിലകം എറണാകുളം
9. റോയല്‍ സിറ്റി മാനൂര്‍, എടപ്പാള്‍
10. ഖൈമ റെസ്‌റ്റോറന്റ് തലപ്പാറ, തിരൂരങ്ങാടി
11 ഏകം നാട്ടുകാല്‍, പാലക്കാട്
12. ലേസാഫയര്‍ സുല്‍ത്താന്‍ബത്തേരി
13. ക്ലാസിക്കോ താന്നിപ്പുഴ, അങ്കമാലി
14. കേരള ഫുഡ് കോര്‍ട്ട് കാലടി, അങ്കമാലി
15. പുലരി കൂത്താട്ടുകുളം
16. ശ്രീ ആനന്ദഭവന്‍ കോട്ടയം
17. അമ്മ വീട് വയയ്‌ക്കല്‍, കൊട്ടാരക്കര
18. ശരവണഭവന്‍ പേരാമ്പ്ര, ചാലക്കുടി
19. ആനന്ദ്ഭവന്‍ പാലപ്പുഴ, മൂവാറ്റുപുഴ
20. ഹോട്ടല്‍ പൂര്‍ണപ്രകാശ,് കൊട്ടാരക്കര
21. മലബാര്‍ വൈറ്റ് ഹൗസ് ഇരട്ടക്കുളം, തൃശൂര്‍-പാലക്കാട് റൂട്ട്
22. എടി ഹോട്ടല്‍ കൊടുങ്ങല്ലൂര്‍
23. ലഞ്ചിയന്‍ ഹോട്ടല്‍, അടിവാരം, കോഴിക്കോട്
24. ഹോട്ടല്‍ നടുവത്ത്, മേപ്പാടി, മാനന്തവാടി
പ്രതികരിക്കാൻ ഇവിടെ എഴുതുക: