കോഴിക്കോട്: ഡിവൈഎഫ്ഐ ബ്ലോക്ക് സെക്രട്ടറി കയ്യും കാലും വെട്ടുമെന്ന് ഭീഷണിപ്പെടുത്തിയതായി സംഘടനയുടെ നരിക്കാട്ടേരി യൂണിറ്റ് കമ്മിറ്റി അംഗം പൊലീസില് പരാതി നല്കി. ഡി വൈ എഫ് ഐ കോഴിക്കോട് നാദാപുരം ബ്ലോക്ക് സെക്രട്ടറി രാഹുല് രാജനെതിരെയാണ് പരാതി.
നരിക്കാട്ടേരി യൂണിറ്റ് കമ്മിറ്റി അംഗം ടി. ജയലേഷ് ആണ് രാഹുല് രാജനെതിരെ പരാതി നല്കിയത്. രാഹുല് രാജിനെതിരായ ഒരു വാട്സ് ആപ്പ് സന്ദേശം ഡിവൈഎഫ്ഐ നേതാക്കള്ക്ക് ജയലേഷ് അയച്ചു നല്കിയിരുന്നു.
ഇതില് പ്രകോപിതനായാണ് രാഹുല് രാജ് ഭീഷണിപ്പെടുത്തിയതെന്നാണ് ജയലേഷ് പരാതിയില് പറയുന്നത്. യഥാര്ത്ഥ വസ്തുത ബന്ധപ്പെട്ട പാര്ട്ടി നേതൃത്വത്തെ അറിയിക്കുകയാണ് ചെയ്തതെന്നും ജയലേഷ് പരാതിയില് ചൂണ്ടിക്കാട്ടുന്നു.
നാദാപുരം ഡിവൈഎസ്പിക്ക് നല്കിയ പരാതിയില് പൊലീസ് കേസ് രജിസ്റ്റര് ചെയ്തിട്ടില്ല. പരാതി പരിശോധിച്ച് വരികയാണെന്നും അതിനുശേഷം തുടര് നടപടി സ്വീകരിക്കുമെന്നും പൊലീസ് അറിയിച്ചു.
