ചേര്‍ത്തല: വി.ഡി. സതീശന്‍ സ്റ്റൈല്‍ കേരളത്തില്‍ ഓടില്ലെന്നും നിക്ഷേധാത്മകവും അഹങ്കാരവുമാണ് പ്രതിപക്ഷ നേതാവിന്റെ മുഖമുദ്രയെന്നും എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍ പറഞ്ഞു. കണിച്ചുകുളങ്ങരയിലെ വസതിയില്‍ മാധ്യമ പ്രവര്‍ത്തകരോട് പ്രതികരിക്കുകയായിരുന്നു അദ്ദേഹം.
ആരെക്കുറിച്ചും എന്ത് തറ വര്‍ത്തമാനവും പറയുന്ന ആളാണ് പ്രതിപക്ഷ നേതാവ്. മറ്റുള്ളവരോട് ബഹുമാനമില്ല. അദ്ദേഹം കോണ്‍ഗ്രസിന്റെ ശവക്കല്ലറ പണിയുന്നു. കെപിസിസി പ്രസിഡന്റിനെ സതീശന്‍ മൂലയ്‌ക്കിരുത്തുന്നു. സുധാകരന്‍ മിടുക്കനും ധൈര്യശാലിയുമാണ്. സ്‌നേഹം കൊടുത്ത് സ്‌നേഹം വാങ്ങണം. വാര്‍ത്ത ഉണ്ടാക്കിയതു കൊണ്ട് ജനങ്ങളുടെ ഹൃദയത്തില്‍ സ്ഥാനമുണ്ടാകില്ല. കഴിഞ്ഞ യുഡിഎഫ് സര്‍ക്കാര്‍ തന്നെ ജയലിലടയ്‌ക്കാന്‍ ശ്രമിച്ചു. സുധീരന്റെ ആവശ്യ പ്രകാരമായിരുന്നു ഇത്.
ചില നേതാക്കള്‍ വ്യക്തി വിദ്വേഷം തീര്‍ക്കുന്നു. കോണ്‍ഗ്രസിന് മുന്നേയും പുറകേയും പോയിട്ടില്ല. കേരളത്തില്‍ ഇടതുപക്ഷം അടുത്ത തവണയും ഭരണത്തില്‍ വരും. ഇത് അവരുടെ ഭരണത്തിന്റെ നേട്ടമെന്ന് അവകാശപ്പെടുന്നില്ല. കോണ്‍ഗ്രസിന്റെ യോജിപ്പില്ലായ്മയും തമ്മില്‍ത്തല്ലുമാണ് ഇതിന് കാരണമാകുകയെന്നും വെള്ളാപ്പള്ളി പറഞ്ഞു.
പ്രതികരിക്കാൻ ഇവിടെ എഴുതുക: