ഹൈദരാബാദ്: തെരുവുകച്ചവടക്കാരനില് നിന്നും മോമോസ് വാങ്ങിക്കഴിച്ച യുവതി ഭക്ഷ്യവിഷബാധയെത്തുടർന്ന് മരിച്ചു. രേഷ്മ ബീഗം (33) ആണ് മരിച്ചത്. ഇതേ കടയില് നിന്ന് മോമോസ് കഴിച്ച രേഷ്മയുടെ രണ്ട് കുട്ടികള് ഉള്പ്പെടെ 15 പേരെ ആശുപത്രിയിൽ പ്രവേശിപ്പിച്ചു. ബന്ജാര ഹില്സിന് സമീപമുള്ള നന്ദി നഗറിലെ തെരുവുകച്ചവടക്കാരനില് നിന്നുമാണ് രേഷ്മയും കുട്ടികളും മോമോസ് വാങ്ങിക്കഴിച്ചത്.
മോമോസ് കഴിച്ചതിന് ശേഷം രേഷ്മയ്ക്ക് ഛര്ദ്ദിയും വയറിളക്കവും വയറുവേദനയും ഉണ്ടായി. ആരോഗ്യനില വഷളായതോടെ ആശുപത്രിയിലേക്ക് കൊണ്ടുപോകുമ്പോഴാണ് മരണം സംഭവിച്ചത്. രേഷ്മയുടെ ബന്ധുക്കളുടെ പരാതിയെ തുടര്ന്ന് ബന്ജാര ഹില്സ് പോലീസ് കേസെടുത്ത് അന്വേഷണം ആരംഭിച്ചു. 15 പേര്ക്കാണ് ഭക്ഷ്യവിഷബാധയേറ്റതെന്നാണ് പോലീസ് പറഞ്ഞതെങ്കിലും മോമോസ് കഴിച്ച 60-ഓളം പേര്ക്ക് ഭക്ഷ്യവിഷബാധയേറ്റതായാണ് പ്രദേശവാസികള് പറയുന്നത്.
കടയുടമയെ നാട്ടുകാര് പിടികൂടി പോലീസിന് കൈമാറി. ഭക്ഷ്യസുരക്ഷാ ലൈസന്സ് ഇല്ലാതെയാണ് ഇയാള് കട നടത്തിയത് എന്ന് അന്വേഷണത്തിൽ കണ്ടെത്തി. കടയില് നിന്നുള്ള ഫുഡ് സാമ്പിളുകള് വിശദമായ പരിശോധനയ്ക്കായി ലബോറട്ടറിയിലേക്ക് അയച്ചിട്ടുണ്ട്.
