കൊല്ലം : അഷ്ടമുടിക്കായലില്‍ മത്സ്യങ്ങള്‍ കൂട്ടത്തോടെ ചത്തുപൊങ്ങിയത് ആല്‍ഗല്‍ ബ്ലൂം പ്രതിഭാസം മൂലമെന്ന് വിലയിരുത്തല്‍. കായലില്‍ മാലിന്യം കലരുന്നതുള്‍പ്പെടെ പായലുകള്‍ പെരുകുന്ന പ്രതിഭാസത്തിന് കാരണമാകുമെന്ന് വിദഗ്ധര്‍ പറഞ്ഞു. അഷ്ടമുടി കായലിലെ കുതിരക്കടവ്, മുട്ടത്തുമൂല ഭാഗങ്ങളിലാണ് ഒരേ ഇനത്തില്‍ പെട്ട മീനുകള്‍ കൂട്ടത്തോടെ ചത്തുപൊങ്ങിയത്.
ഈ കഴിഞ്ഞ 26-ാം തീയതി വൈകിട്ട് മുതലാണ് മീനുകള്‍ ചത്ത് പൊങ്ങുന്നത് ആദ്യമായി ശ്രദ്ധയില്‍പ്പെട്ടത്. ഒറ്റ ദിവസം കൊണ്ട് വലിയ തോതിലാണ് മീനുകള്‍ ചത്ത് പൊങ്ങി കരയ്‌ക്കടിഞ്ഞത്. തുടര്‍ന്ന് ജില്ലാ ഫിഷറീസ് ഉദ്യോഗസ്ഥരും മലിനീകരണ ബോര്‍ഡും പ്രദേശത്തെത്തി മത്സ്യങ്ങളുടേയും വെള്ളത്തിന്റേയും സാമ്പിളുകള്‍ ശേഖരിച്ചു. കുഫോസിന്റെ മൊബൈല്‍ ലാബടക്കമെത്തിച്ചാണ് സാമ്പിളുകളെടുത്തത്.ആല്‍ഗല്‍ ബ്ലൂം എന്ന പ്രതിഭാസം ഉണ്ടായതാണ് മത്സ്യങ്ങള്‍ കൂട്ടത്തോടെ ചാവാന്‍ കാരണമെന്നാണ് പ്രാഥമിക നിഗമനം. ആല്‍ഗകള്‍ അനിയന്ത്രിതമായി പെരുകുന്നതാണ് ആല്‍ഗല്‍ ബ്ലൂം പ്രതിഭാസം. ഇത് കായലിലെ ഓക്‌സിജന്റെ അളവ് കുറയുന്നതിനും മത്സ്യങ്ങള്‍ ചത്ത് പൊങ്ങുന്നതിനും കാരണമാകും.
മത്സ്യങ്ങള്‍ ചാവുന്നതിന് മുമ്പുള്ള ദിവസങ്ങളില്‍ തുടര്‍ച്ചയായി മഴ പെയ്തിരുന്നു. കരയില്‍ നിന്നും കായലിലേക്ക് ഒലിച്ചിറങ്ങുന്ന വെള്ളത്തില്‍ നൈട്രജന്‍ ഫോസ്ഫറസ് തുടങ്ങിയ മൂലകങ്ങള്‍ കൂടുതലാണെങ്കിലും ആല്‍ഗല്‍ ബ്ലൂം സംഭവിക്കുമെന്നാണ് വിദഗ്ധരുടെ വിലയിരുത്തല്‍. ജൈവമാലിന്യം ഉള്‍പ്പെടെ കായലിലേക്ക് ഒഴുകിയെത്തുന്നതും ഇതിന്റെ സാധ്യതകൂട്ടും. വെള്ളത്തിന്റേയും മീനുകളുടേയും പരിശോധന ഫലം വന്നതിന് ശേഷം മാത്രമേ മിനുകള്‍ ചത്തതിന് പിന്നിലെ യഥാര്‍ത്ഥ കാരണം സ്ഥിരീകരിക്കാനാകുവെന്ന് വിദഗ്ധ സംഘം വ്യക്തമാക്കി.
പ്രതികരിക്കാൻ ഇവിടെ എഴുതുക: