മറൈന്‍ഡ്രൈവില്‍ നടന്ന ഏജസ് ഫെഡറല്‍ ലൈഫ് ഇന്‍ഷുറന്‍സ് കൊച്ചി സ്പൈസ് കോസ്റ്റ് മാരത്തണ്‍ സച്ചിന്‍ ടെണ്ടുല്‍ക്കര്‍ ഫഌഗ് ഓഫ് ചെയ്യുന്നു
കൊച്ചി: ഏജസ് ഫെഡറല്‍ ലൈഫ് ഇന്‍ഷുറന്‍സ് കൊച്ചി സ്പൈസ് കോസ്റ്റ് മാരത്തണില്‍ കേരള താരങ്ങള്‍ക്ക് കിരീടം. എറണാകുളം മറൈന്‍ഡ്രൈവില്‍ നിന്ന് തുടങ്ങി ഇതേ വേദിയില്‍ അവസാനിച്ച ഫുള്‍ മാരത്തണിന്റെ പുരുഷ വിഭാഗത്തില്‍ ഫോര്‍ട്ട് കൊച്ചി സ്വദേശി സിബി ബെന്‍സണും, വനിതാ വിഭാഗത്തില്‍ റീന മനോഹറും വിജയികളായി.
പുലര്‍ച്ചെ 3.30ന് മറൈന്‍ഡ്രൈവ് ഗ്രൗണ്ടില്‍ ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കര്‍ ഫുള്‍ മാരത്തണ്‍ ഫ്ളാഗ് ഓഫ് ചെയ്തു. ഹാഫ് മാരത്തണ്‍, ഫണ്‍ റണ്‍ എന്നിവയുടെ ഫ്ളാഗ് ഓഫും അദ്ദേഹം നിര്‍വഹിച്ചു. ഇത്രയും അതിരാവിലെ തന്നെ ഓടാന്‍ ഇഷ്ടപ്പെടുന്ന ധാരാളം ആളുകള്‍ വരുന്നത് കാണുന്നതില്‍ ഏറെ സന്തോഷമുണ്ടെന്ന് സച്ചിന്‍ പറഞ്ഞു.
സിബി ബെന്‍സണ്‍ 3 മണിക്കൂര്‍ 42 മിനിറ്റ് സമയത്തിലാണ് 42.2 കിലോമീറ്റര്‍ ഓട്ടം ഫിനിഷ് ചെയ്തത്. കഴിഞ്ഞ രണ്ട് എഡിഷനുകളിലും രണ്ടാം സ്ഥാനത്തെത്തിയ താരം, തന്റെ മൂന്നാം മത്സരത്തില്‍ വെന്നിക്കൊടി പാറിക്കുകയായിരുന്നു. ചെറായി സ്വദേശി ജസ്റ്റിന്‍ (03:06:56) ഈ വിഭാഗത്തില്‍ രണ്ടാം സ്ഥാനം നേടി. ശ്രീനിധി ശ്രീകുമാര്‍(03:08:49) ആണ് മൂന്നാമതെത്തിയത്. 42.2 കി.മീ ദൂരം 4 മണിക്കൂര്‍ 50:06 മിനിറ്റ് സമയത്തില്‍ പിന്നിട്ടാണ് വനിതാ വിഭാഗത്തില്‍ റീന മനോഹര്‍ ജേതാവായത്. മേരി ജോഷി (04:53:59), നിലീന ബാബു (04:54:32) എന്നിവര്‍ യഥാക്രം രണ്ടും മൂന്നും സ്ഥാനങ്ങള്‍ നേടി.
ഹാഫ് മാരത്തണില്‍ ഇടുക്കി വെള്ളാരംകുന്ന് സ്വദേശി സജിത്ത് കെ.എം (1:21:23) ജേതാവായി. സ്പൈസ് കോസ്റ്റ് മാരത്തണില്‍ സജിത്തിന്റെ ഹാട്രിക് വിജയമാണിത്. ഈ വിഭാഗത്തില്‍ കൊല്ലം സ്വദേശി അതുല്‍ രാജ് (01:22:37) രണ്ടാം സ്ഥാനവും നേടി. വനിതകളില്‍ എ.കെ.രമ (1:55:33), ജസീന ഖനി (1:58:03) എന്നിവര്‍ വിജയികളായി.
പ്രതികരിക്കാൻ ഇവിടെ എഴുതുക