കുമ്പള:ശാപമോക്ഷം തേടി യക്ഷഗാന കുലപതി പാര്ത്ഥി സുബ്ബയുടെ നിത്യസ്മാരകം. പുത്തിഗെ പഞ്ചായത്തിലെ എടനാട് വില്ലേജില്പ്പെട്ട മുജങ്കാവില് പണിതീര്ത്ത യക്ഷഗാനകലാ അക്കാദമി കെട്ടിടമാണ് നാഥനില്ലാതെ നാശത്തിന്റെ വക്കിലെത്തി നില്ക്കുന്നത്.
സി.എച്ച് കുഞ്ഞമ്പു മഞ്ചേശ്വരം എംഎല്എയായിരിക്കെ യക്ഷഗാന കുലപതിയായിരുന്ന പാര്ത്ഥിസുബ്ബന്റെ പേരില് യക്ഷഗാന കലാ അക്കാദമിക്ക് രൂപം നല്കിയിരുന്നു. ഇതുപ്രകാരം ആ കാലയളവില് സിപിഎം അംഗങ്ങളെ ഉള്പ്പെടുത്തി കമ്മറ്റിക്ക് രൂപംനല്കി. കമ്മറ്റി അംഗങ്ങളില് ആറുപേര് ചേര്ന്ന് മുജങ്കാവ് പാര്ത്ഥ സാരഥി ക്ഷേത്രത്തില് നിന്ന് അല്പം മാറി കിഴക്ക് ഭാഗത്ത് 15 സെന്റ് സ്ഥലത്ത് കെട്ടിട നിര്മാണ പ്രവൃത്തിക്ക് തുടക്കം കുറിച്ചു. അക്കാലയളവില് ജില്ലാപഞ്ചായത്ത് അംഗമായിരുന്ന ശങ്കര്റൈ ആയിരുന്നു യക്ഷഗാന കലാഅക്കാദമി പ്രസിഡന്റ്.
2008-09 സാമ്പത്തിക വര്ഷത്തില് സി.എച്ച്.കുഞ്ഞമ്പു എംഎല്എയുടെ ആസ്തി വികസന ഫണ്ടില് നിന്ന് 20 ലക്ഷം രൂപ അനുവദിക്കുകയും കുമ്പളയിലെ വ്യാപാര പ്രമുഖനായ അനന്തപൈ കണ്വീനറായി യക്ഷ ഗാനകലാ അക്കാദമി കെട്ടിട സമുച്ചയത്തിന് തുടക്കംകുറിച്ചു. എന്നാല് തുടക്കത്തില് തന്നെ പ്രവൃത്തിയില് കൃത്രിമമുള്ളതായി ആരോപണം ഉയര്ന്നിരുന്നു. കെട്ടിട നിര്മാണം പൂര്ത്തിയാകുന്നതിന് മുന്പ് തറയില് ടൈല്സ് പാകിയതും ചര്ച്ച വിഷമായിരുന്നു. ഇതിനിടെ കണ്വീനര് അനന്തപൈ മരണപ്പെടുകയും കെട്ടിട നിര്മാണം നിലയ്ക്കുകയും ചെയ്തു. ഇതോടെ സംസ്ഥാനത്ത് ഭരണം മാറുക യും ചെയ്തു.പിന്നീട് യക്ഷഗാന കലാകാരനായിരുന്ന എടനീരിലെ ജയരാമനെ യക്ഷഗാനകലാ അക്കാദമി ചെയര്മാനായി പുതിയ കമ്മറ്റിക്ക് സര്ക്കാര് അംഗീകാരം നല്കി.
അക്കാദമിക്ക് വേണ്ടി പ്രത്യേക ഫണ്ട് നീക്കിവയ്ക്കാത്തതിനെ തുടര്ന്ന് തുടക്കത്തില് ഉണ്ടായിരുന്ന ഫണ്ട് പാഴാവുകയും ചെയ്തു. പിന്നീട്മാറിവന്ന എംഎല്എമാരാകട്ടെ ഇതൊന്നും കണ്ടില്ലെന്ന് നടിക്കുകയാണ്.ഇതോടെ മുജങ്കാവില് പ്രകൃതി രമണീയമായ സ്ഥലത്ത് സ്ഥിതിചെയ്യുന്ന യക്ഷഗാന കലാ അക്കാദമി കെട്ടിടത്തിന്റെ മേല്ക്കുരയ്ക്ക് ഘടിപ്പിച്ച ഇരുമ്പുകള് തുരുമ്പെടുത്ത് നശിക്കുകയാണ്. തറയില് പാകിയ ടൈല്സുകളും ജനല് പാളികളും മറ്റും മോഷ്ടിച്ചുകൊണ്ടുപോവുകയും ചെയ്തു. ഇതോടെ യക്ഷഗാന കുലപതി പാര്ത്ഥി സുബ്ബയുടെ നി ത്യസ്മാരകം നാഥനില്ലാതെ നശിക്കുകയാണ്.
