ബംഗളൂരു: ഇന്ത്യയ്ക്കെതിരായ പരമ്പരയിലെ കന്നി ടെസ്റ്റില് ന്യൂസിലന്ഡിന് എട്ട് വിക്കറ്റ് ജയം. അഞ്ചാം ദിവസം 107 റണ്സ് വിജയലക്ഷ്യവുമായി ചിന്നസ്വാമി സ്റ്റേഡിയത്തില് ബാറ്റിംഗിനിറങ്ങിയ ന്യൂസിലന്ഡ് ആദ്യസെഷനില് തന്നെ രണ്ടുവിക്കറ്റ് മാത്രം നഷ്ടത്തില് അനായാസം വിജയം നേടി.
ഇന്ത്യയില് ന്യൂസിലന്ഡിന്റെ മൂന്നാമത്തെ മാത്രം ടെസ്റ്റ് വിജയമാണിത്.ഇന്ത്യന് മണ്ണില് 36 വര്ഷത്തിന് ശേഷമാണ് ന്യൂസിലന്ഡ് ടെസ്റ്റ് വിജയിക്കുന്നത്.
ഓപ്പണര്മാരായ ടോം ലാഥം (0), ഡെവണ് കോണ്വെ (17) എന്നിവരുടെ വിക്കറ്റുകളാണ് ന്യുസിലന്ഡിന് നഷ്ടമായത്. രചിന് രവീന്ദ്ര (39), വില് യംഗ് (45) എന്നിവര് ചേര്ന്ന് സന്ദര്ശകരെ വിജയത്തിലേക്ക് എത്തിക്കുകയായിരുന്നു. ജസ്പ്രീത് ബുംറയാണ് രണ്ടുവിക്കറ്റും വീഴ്ത്തിയത്. ഇരു ബാറ്റര്മാരെയും വിക്കറ്റിന് മുന്നില് കുടുക്കുകയായിരുന്നു. ഇതോടെ മൂന്ന് മത്സര പരമ്പരയില് ന്യൂസിലന്ഡ് മുന്നിലെത്തി. സ്കോര്: ഇന്ത്യ 46, 462 & ന്യൂസിലന്ഡ് 402, 110.
