തിരുവനന്തപുരം: കേരളം കര്‍ണാടക രഞ്ജി ട്രോഫി മത്സരത്തില്‍ മഴ മുക്കാല്‍ പങ്കും കളി അപഹരിച്ച ആദ്യ ദിവസം കര്‍ണ്ണാടയ്‌ക്കെതിരെ കേരളത്തിന് മികച്ച തുടക്കം. ആദ്യ ദിവസം കളി അവസാനിക്കുമ്പോള്‍ വിക്കറ്റ് പോകാതെ 88 റണ്‍സെന്ന നിലയിലാണ് കേരളം.
57 റണ്‍സോടെ രോഹന്‍ കുന്നുമ്മലും 31 റണ്‍സോടെ വത്സല്‍ ഗോവിന്ദുമാണ് ക്രീസില്‍. മഴയെ തുടര്‍ന്ന് വൈകി തുടങ്ങിയ മത്സരത്തില്‍ 23 ഓവര്‍ മാത്രമാണ് ആദ്യ ദിവസം എറിയാനായത്. ടോസ് നേടിയ കര്‍ണ്ണാടക ഫീല്‍ഡിങ് തെരഞ്ഞെടുത്തു. ആക്രമിച്ചു കളിച്ചു തുടങ്ങിയ രോഹന്‍ കുന്നുമ്മല്‍ 74 പന്തില്‍ ഒന്‍പത് ഫോറും ഒരു സിക്‌സുമടക്കമാണ് 57 റണ്‍സെടുത്തത്. നാല് ഫോറടങ്ങുന്നതായിരുന്നു വത്സല്‍ ഗോവിന്ദിന്റെ ഇന്നിങ്‌സ്.
കഴിഞ്ഞ മത്സരത്തില്‍ നിന്ന് മൂന്ന് മാറ്റങ്ങളുമായാണ് കേരളം കര്‍ണ്ണാടകയ്‌ക്കെതിരെ കളിക്കാന്‍ ഇറങ്ങിയത്. അന്താരാഷ്‌ട്ര ട്വന്റി20 ഷെഡ്യൂളിന് താല്‍ക്കാലിക ഇടവേളയായതിനെ തുടര്‍ന്ന് മടങ്ങിയെത്തിയ സഞ്ജു സാംസണ്‍ അന്തിമ ഇലവനിലുണ്ട്. സഞ്ജുവിനെ കൂടാതെ നിതീഷ് എം.ഡി, കെ.എം.ആസിഫ് എന്നിവരെയും ടീമില്‍ ഉള്‍പ്പെടുത്തി. കഴിഞ്ഞ മത്സരത്തില്‍ കളിച്ച വിഷ്ണു വിനോദ്, അക്ഷയ് ചന്ദ്രന്‍, സല്‍മാന്‍ നിസാര്‍ എന്നിവരെ മാറ്റിയാണ് ഇവര്‍ മൂവരെയും ഉള്‍പ്പെടുത്തിയത്.
ആദ്യ മത്സരത്തില്‍ പഞ്ചാബിനെതിരെ നേടിയ ഉജ്ജ്വല വിജയത്തിന്റെ ആത്മവിശ്വാസത്തിലാണ് കേരളം. ഒന്നാം ഇന്നിങ്‌സ് ലീഡ് വഴങ്ങിയ ശേഷം ശക്തമായി തിരിച്ചു വരവിലൂടെയാണ് പഞ്ചാബിനെതിരായ മത്സരം എട്ട് വിക്കറ്റിന് ജയിച്ചത്.
പ്രതികരിക്കാൻ ഇവിടെ എഴുതുക: