തിരുവനന്തപുരം: സി.കെ. നായിഡു ക്രിക്കറ്റ് ട്രോഫിയില് കേരളത്തിനെതിരെ ചണ്ഡീഗഢ് പൊരുതുന്നു. കേരളത്തിന്റെ ഒന്നാം ഇന്നിങ്സ് സ്കോറായ 384 റണ്സിനെതിരെ രണ്ടാം ദിവസത്തെ കളി നിര്ത്തുമ്പോള് നാല് വിക്കറ്റ് നഷ്ടത്തില് 245 റണ്സെന്ന ഭേദപ്പെട്ട നിലയിലാണ് ചണ്ഡീഗഢ്.
മറുപടി ബാറ്റിങ്ങില് ചണ്ഡീഗഢിന് ഓപ്പണര്മാരായ ദേവാങ് കൗശിക്കും അര്ണവ് ബന്സലും ചേര്ന്ന് മികച്ച തുടക്കമാണ് നല്കിയത്. ഇരുവരും ചേര്ന്ന് ഒന്നാം വിക്കറ്റില് 92 റണ്സ് കൂട്ടിച്ചേര്ത്തു. 62 റണ്സെടുത്ത അര്ണവ് ബന്സലിനെ പുറത്താക്കി കിരണ് സാഗറാണ് കേരളത്തിന് ആദ്യ വിക്കറ്റ് നേടിക്കൊടുത്തത്. പിന്നാലെ ദുഷ്യന്ത് 13 റണ്സെടുത്തും ഗുര്താജ് സിങ് ബെയ്ന്സ് (14), പരസ് (15) എന്നിവര് പുറത്തായതോടെ ചണ്ഡീഗഢ് നാലിന് 172 എന്ന നിലയിലായി. അതിനുശേഷം അഞ്ചാം വിക്കറ്റില് ദേവാങ് കൗശിക്കിനൊപ്പം ഒത്തുചേര്ന്ന നിഖില് (49) എന്നിവരാണ് കൂടുതല് വിക്കറ്റുകള് നഷ്ടപ്പെടുത്താതെ രണ്ടാം ദിവസത്തെ കളി അവസാനിപ്പിച്ചത്. കേരളത്തിന് വേണ്ടി കിരണ് സാഗര് രണ്ട് വിക്കറ്റും ഷോണ് റോജറും ജെ.എസ്. അനുരാജും ഓരോ വിക്കറ്റും വീഴ്ത്തി.
ഇന്നലെ ഏഴ് വിക്കറ്റിന് 325 റണ്സെന്ന നിലയില് രണ്ടാം ദിവസം കളിയാരംഭിച്ച കേരളത്തിന് 59 റണ്സ് കൂടി മാത്രമാണ് ചേര്ക്കാനായത്. 24 റണ്സെടുത്ത ഏദന് ആപ്പിള് ടോമാണ് ആദ്യം മടങ്ങിയത്. സ്കോര് 372ല് നില്ക്കെ ഷോണ് റോജറുടെ വിക്കറ്റും നഷ്ടമായി. 14 ഫോറും നാല് സിക്സുമടക്കം 165 റണ്സെടുത്ത ഷോണിന്റെ ഉജ്ജ്വല ഇന്നിങ്സാണ് കേരളത്തിന് കരുത്തായത്. കിരണ് സാഗര് 12ഉം അഖിന് രണ്ടും റണ്സെടുത്തു. ചണ്ഡിഗഢിന് വേണ്ടി ഇവ്രാജ് രണൗട്ട ഏഴ് വിക്കറ്റ് വീഴ്ത്തി.
