മലപ്പുറം: സ്കൂട്ടർ യാത്രികയായ യുവതിയെ പിന്തുടർന്നെത്തി വീട്ടിൽ അതിക്രമിച്ച് കയറി സ്വർണക്കവർച്ച നടത്തിയ കേസിലെ പ്രതി മുംബൈയിൽ അറസ്റ്റിലായി. സംഭവത്തിൽ നേരത്തെ പിടിയിലായ പ്രതി ജാമ്യത്തിലിറങ്ങി മുങ്ങുകയായിരുന്നു. കൊണ്ടോട്ടി മുതുപറമ്പ് പരതക്കാട് വീട്ടിച്ചാലില്‍ കെ വി മുഹമ്മദ് ഫവാസ് (25) ആണ് അറസ്റ്റിലായത്.
2023 നവംബറിലാണ് കേസിനാസ്പദമായ സംഭവം. സ്‌കൂട്ടറില്‍ പോകുകയായിരുന്ന പുളിക്കല്‍ പഞ്ചായത്തംഗം അഷ്‌റഫിന്റെ മരുമകള്‍ മനീഷ പര്‍വീനെ (27) ബൈക്കില്‍ പിന്തുടര്‍ന്ന് വീട്ടിലേക്ക് അതിക്രമിച്ചു കയറി ആക്രമിച്ച്‌ മാലയടക്കം ഒമ്പത് പവന്‍ സ്വര്‍ണം മോഷ്ടിക്കുകയായിരുന്നു.
സംഭവത്തിന് ശേഷം മറ്റൊരു മോഷണ കേസില്‍ പിടിയിലായി ജാമ്യത്തിലിറങ്ങി വിദേശത്തേക്ക് മുങ്ങിയ പ്രതി കഴിഞ്ഞ ദിവസം മുംബൈയില്‍ എത്തിയപ്പോഴാണ് മുംബൈ പോലീസ് കസ്റ്റഡിയിലെടുത്ത് കൊണ്ടോട്ടി പോലീസിന് കൈമാറുകയായിരുന്നു. അറസ്റ്റ് ചെയ്ത ശേഷം പെരിന്തല്‍മണ്ണ കോടതിയില്‍ ഹാജരാക്കിയ ഫവാസിനെ റിമാന്‍ഡ് ചെയ്തു.
പ്രതികരിക്കാൻ ഇവിടെ എഴുതുക: