രൂപീകരിക്കുന്നത് സാമൂഹിക കൂട്ടായ്മ; തദ്ദേശ തെരഞ്ഞെടുപ്പിലും ഉപതെരഞ്ഞെടുപ്പുകളിലടക്കം മത്സരിക്കുമെന്ന് പി.വി അൻവർ

മലപ്പുറം: മഞ്ചേരിയിൽ രൂപീകരിക്കാൻ പോകുന്നത് രാഷ്‌ട്രീയ പാർട്ടിയല്ല സാമൂഹിക കൂട്ടായ്മയാണെന്ന് പി.വി. അൻവർ എംഎൽഎ. പിന്നീട് ജനങ്ങളുമായി ആലോചിച്ച് തുടർനടപടികൾ സ്വീകരിക്കുമെന്ന് പി.വി. അൻവർ വ‍്യക്തമാക്കി. ഡെമൊക്രാറ്റിക് മൂവ്മെന്‍റ് ഓഫ് കേരള (DMK) എന്ന പേരിലാണ് സംഘടന രൂപികരിക്കുന്നതെന്ന് പി.വി. അൻവർ സ്ഥിരീകരിച്ചു. മഞ്ചേരിയിൽ ഞായറാഴ്ച നടക്കുന്ന വിശദീകരണയോഗത്തിലും നയ പ്രഖ‍്യാപനത്തിലും സാധാരണക്കാരായ ആളുകൾ പങ്കെടുക്കും.

തദ്ദേശ തെരഞ്ഞെടുപ്പിലും ഉപതെരഞ്ഞെടുപ്പുകളിലടക്കം മത്സരിക്കുമെന്നും എന്നാൽ സംഘടനയുടെ ഇപ്പോഴത്തെപേരിലാകുമോ അതെന്ന് പറയാനാവില്ലെന്നും അദ്ദേഹം വ്യക്തമാക്കി. ‘എന്നെ സംബന്ധിച്ച് പ്രമുഖർ എന്ന് പറയുന്നത് നാട്ടിലെ സാധാരണക്കാരായ മനുഷ‍്യരാണ്. അവർ ഉണ്ടാകും. തമിഴ്നാട്ടിലെ സാധാരണക്കാരായ ജനങ്ങൾക്കൊപ്പമുള്ള പാർട്ടിയാണ് ഡിഎംകെ. ആ സാധാരണക്കാരായ ജനങ്ങളും ഇതിൽ പങ്കെടുക്കും’. അൻവർ പറഞ്ഞു. അതേസമയം ശനിയാഴ്ച ഡിഎംകെ നേതാക്കളുമായി കൂടിക്കാഴ്ച നടത്താൻ തമിഴ്നാട്ടിൽ പോയെന്ന വാർത്ത അൻവർ നിഷേധിച്ചു.

സംസ്ഥാനത്തെ മൊത്തം വിഷയങ്ങൾ ഉയർത്തിക്കാട്ടി മുന്നോട്ട് പോകും. എംഎൽഎ സ്ഥാനം രാജിവയ്‌ക്കുന്ന കാര്യം ആ സമയത്ത് ആലോചിക്കാം. കേരളത്തിലെ ജനങ്ങളുടെ ജനാധിപത്യപരമായ മുന്നേ​റ്റമായത് കൊണ്ടാണ് പേര് നിശ്ചയിച്ചത്. പകൽ സൂര്യവെളിച്ചമുണ്ട്. എന്നാൽ രാത്രി ടോർച്ച് വെളിച്ചം വേണം. അതുകൊണ്ടാണ് ടോർച്ച് സംഘടനയുടെ പേരിന് ഒപ്പം വച്ചത്. അർജുനും മനാഫും മതേതരത്വത്തിന്റെ പ്രതീകമാണ്. എനിക്ക് മേലെ വർഗീയതയുടെ ചാപ്പ കുത്തിയിരിക്കുകയാണ്. അതുകൊണ്ടാണ് മനാഫിന്റെയും അർജുന്റെയും ചിത്രം ബോർഡുകളിൽ വച്ചത്. സ്വന്തം നാടായത് കൊണ്ടാണ് മഞ്ചേരിയിൽ പ്രഖ്യാപനം നടത്താൻ തീരുമാനിച്ചത് . വീരചരിത്രം ഉറങ്ങുന്ന മണ്ണാണ് ഇവിടം’ അൻവർ പറഞ്ഞു.

ഇന്ന് നടക്കുന്ന വിശദീകരണ യോഗത്തിൽ ഒരു ലക്ഷം പേർ പങ്കെടുക്കുമെന്നാണ് പ്രതീക്ഷിക്കുന്നത്. അതിനാൽ സുരക്ഷാ ക്രമീകമീകരണങ്ങളും ശക്തമാക്കിയിട്ടുണ്ട്.