കോഴിക്കോട്: താമരശേരി ചുങ്കത്ത് ഐ.ഒ.സി പെട്രോള് പമ്പ് ജീവനക്കാരെ തല്ലിച്ചതച്ച് ജീപ്പില് ഇന്ധനം നിറക്കാന് എത്തിയ യുവാവ്. ഇന്ധനം നിറച്ച ശേഷം പണം കൈമാറുന്നതുമായി ബന്ധപ്പെട്ടുണ്ടായ തര്ക്കത്തെ തുടര്ന്നാണ് താമരശേരി കെടവൂര് സ്വദേശി മര്ദിച്ചത്. കഴിഞ്ഞ രാത്രി പന്ത്രണ്ടു മണിയോടെയാണ് സംഭവം.
പെട്രോള് പമ്പിലെത്തിയ യുവാവ് ജീപ്പില് നൂറു രൂപക്കാണ് ഡീസല് നിറക്കാന് ആവശ്യപ്പെട്ടത്. ഡീസല് നിറച്ച ശേഷം ഗൂഗിള് പേ ചെയ്യാനായി ഇ പോസ് മെഷീനില് നൂറിന് പകരം ജീവനക്കാര് 1000 രൂപ രേഖപ്പെടുത്തി. ഇതോടെ തര്ക്കമായി.അബദ്ധം പറ്റിയതാണെന്നും ഇടപാട് നടന്നിട്ടില്ലെന്നും പറഞ്ഞപ്പോള് യുവാവ് അക്രമിക്കുകയായിരുന്നുവെന്ന് ജീവനക്കാരന് പറഞ്ഞു
പമ്പ് ജീവനക്കാരനായ അടിവാരം സ്വദേശി ടിറ്റോയെ ആണ് യുവാവ് ആദ്യം മര്ദ്ദിച്ചത്. ഇത് തടയാന് ശ്രമിച്ചപ്പോഴാണ് മറ്റൊരു ജീവനക്കാരനായ അഭിഷേകിനും മര്ദ്ദനമേറ്റത്. പമ്പില് ഇന്ധനം നിറയ്ക്കാനെത്തിയ മറ്റ് യാത്രക്കാര് ഇടപെട്ടാണ് ഒടുവില് യുവാവിനെ പിന്തിരിപ്പിച്ചത്. പരിക്കേറ്റ ജീവനക്കാര് താമരശേരി താലൂക്ക് ആശുപത്രിയില് ചികിത്സ തേടി. സംഭവത്തില് പമ്പുടമ താമരശേരി പൊലീസില് പരാതി നല്കി.
