ടെല് അവീവ്: ഐക്യരാഷ്ട്രസഭാ സെക്രട്ടറി ജനറല് അന്റോണിയോ ഗുട്ടെറെസിന് ഇസ്രയേലില് പ്രവേശിക്കുന്നതിന് വിലക്ക് ഏര്പ്പെടുത്തി ഇസ്രയേല് സര്ക്കാര്. ഐക്യരാഷ്ട്രസഭാ സെക്രട്ടറി ജനറലിനെ ഇസ്രയേല് അസ്വീകാര്യനായ വിദേശ പ്രതിനിധി / നയതന്ത്രജ്ഞന് ആയി പ്രഖ്യാപിച്ചിട്ടുമുണ്ട്.
ഇറാന്റെ മിസൈല് ആക്രമണത്തെക്കുറിച്ചുള്ള പ്രതികരണത്തിന്റെ പേരിലാണ് വിലക്ക്. ഇറാന്റെ ആക്രമണമുണ്ടായതിന് ശേഷം എക്സില് പങ്കുവെച്ച കുറിപ്പില് പശ്ചിമേഷ്യയിലെ സംഘര്ഷത്തെ അപലപിക്കുന്നതായും അത് ഉടന് അവസാനിപ്പിക്കണമെന്നും ഗുട്ടെറെസ് ആവശ്യപ്പെട്ടിരുന്നു. എന്നാല് ആക്രമണം നടത്തിയ ഇറാനെ അദ്ദേഹം പരാമര്ശിച്ചില്ല. ഇതാണ് ഇസ്രയേലിനെ പ്രകോപിപ്പിച്ചത്.
ഗുട്ടെറെസിനെ ‘ഭീകരവാദികളെ പിന്തുണയ്ക്കുന്ന ഇസ്രയേല് വിരുദ്ധ സെക്രട്ടറി ജനറല് എന്നാണ് ഇസ്രയേല് വിദേശകാര്യമന്ത്രി കാറ്റ്സ് വിശേഷിപ്പിച്ചത്.
‘ഇറാന്റെ ക്രൂരമായ ആക്രമണത്തെ അപലപിക്കാന് കഴിയാത്ത ആര്ക്കും ഇസ്രയേല് മണ്ണില് കാലുകുത്താന് അര്ഹതയില്ല’ എന്നും കാറ്റ്സ് വ്യക്തമാക്കി. ‘യുദ്ധം ആരംഭിച്ചതുമുതല് ഗുട്ടെറെസിന്റേത് ഇസ്രയേല് വിരുദ്ധ നയമാണെന്നും കാറ്റ്സ് കുറ്റപ്പെടുത്തി
