ഭക്തർക്ക് ബുദ്ധിമുട്ടുകൾ ഉണ്ടാകരുത് ; അക്രമം വച്ചുപൊറുപ്പിക്കരുത് ; നവരാത്രി ഉത്സവത്തോടനുബന്ധിച്ച് ജാഗ്രത പാലിക്കാൻ പോലീസിന് യോഗിയുടെ നിർദേശം

ലക്നൗ : നവരാത്രി ഉത്സവത്തോടനുബന്ധിച്ച് 24 മണിക്കൂറും ജാഗ്രത പാലിക്കാൻ യുപി പോലീസിന് മുഖ്യമന്ത്രി യോഗി ആദിത്യനാഥിന്റെ നിർദേശം . എല്ലാ ജില്ലകളിലും ജാഗ്രത പാലിക്കണമെന്നും ശാരദിയ നവരാത്രി മുതൽ ഛത്ത് പൂജ വരെയുള്ള മുഴുവൻ ദിവസവും അനിഷ്ട സംഭവങ്ങൾ ഉണ്ടാകാതിരിക്കാൻ ക്രമീകരണങ്ങൾ ചെയ്യണമെന്നും അദ്ദേഹം പറഞ്ഞു.

ബീറ്റ് കോൺസ്റ്റബിൾ മുതൽ ഡിവിഷൻ വരെയുള്ള എല്ലാ ഉദ്യോഗസ്‌ഥരും ഇതിനായി പരിശ്രമിക്കണമെന്നും മുഖ്യമന്ത്രി പറഞ്ഞു. ചൊവ്വാഴ്ച വീഡിയോ കോൺഫറൻസിംഗിൽ മുഖ്യമന്ത്രി യോഗി എല്ലാ ജില്ലാ മജിസ്‌ട്രേറ്റുമാരുമായും പോലീസ് ഉദ്യോഗസ്ഥരുമായും സംസാരിച്ചു. ഉത്സവാന്തരീക്ഷത്തിൽ ജില്ലാതലത്തിൽ ക്രമസമാധാനനില മെച്ചപ്പെടുത്തുന്നതിനുള്ള പ്രവർത്തനങ്ങൾ മുഖ്യമന്ത്രി അവലോകനം ചെയ്തു.

അടുത്ത രണ്ട് ദിവസങ്ങളിൽ പോലീസ് എല്ലാ ദുർഗാപൂജ കമ്മിറ്റികളുമായും ആശയവിനിമയം നടത്തണം. റോഡ് കുഴിച്ച് എവിടെയും പന്തലുകൾ ഉണ്ടാക്കരുത്. പന്തൽ നിർമിക്കുമ്പോൾ ഗതാഗതവും ശ്രദ്ധിക്കണം.പ്രതിമയുടെ ഉയരം പരിധി കവിയാൻ പാടില്ല. കമ്മറ്റികളുമായി സംസാരിച്ച് മറ്റൊരാളുടെ വിശ്വാസത്തെ വ്രണപ്പെടുത്തുന്ന ഒന്നും പരിസരത്ത് നടക്കുന്നില്ലെന്ന് ഉറപ്പാക്കുക. കൂടാതെ, പാട്ടുകളും സംഗീതവും വളരെ ഉച്ചത്തിലുള്ള ശബ്ദത്തിൽ പ്ലേ ചെയ്യാൻ പാടില്ല. പന്തലിലും പരിസരത്തും വൃത്തിയുള്ള അന്തരീക്ഷം സമിതി നിലനിർത്തണം.

ശാരദിയ നവരാത്രിയിൽ വൻ ഭക്തജനത്തിരക്കുണ്ടാകുമെന്നത് കണക്കിലെടുത്ത് പോലീസ് സേനയെ വിന്യസിക്കണം. ഭക്തരുടെ സൗകര്യവും സുരക്ഷയും കണക്കിലെടുത്ത്, മിർസാപൂരിലെ മാ വിന്ധ്യവാസിനി ധാം, സഹരൻപൂരിലെ മാ ശകുംബരി ക്ഷേത്രം, വാരണാസിയിലെ വിശാലാക്ഷി ക്ഷേത്രം, ബൽറാംപൂരിലെ മാ പതേശ്വരി ധാം എന്നിവിടങ്ങളിൽ മെച്ചപ്പെട്ട ക്രമീകരണങ്ങൾ ഒരുക്കണം. എല്ലാ ക്ഷേത്ര പരിസരങ്ങളിലും ശുചിത്വം ഉണ്ടായിരിക്കണം.എല്ലാ ആശുപത്രികളിലും 24×7 ഡോക്‌ടർമാർ ഉണ്ടായിരിക്കണം. അടിയന്തരാവസ്ഥയിൽ ഉപയോഗപ്രദമായ മരുന്നുകൾക്ക് ക്ഷാമം ഉണ്ടാകരുത്, ഭക്ഷ്യവസ്തുക്കളിൽ മായം ചേർക്കുന്നതിനെതിരെയുള്ള പ്രചാരണം തുടരുക.

ദീപാവലിയോടനുബന്ധിച്ച്, പ്രധാനമന്ത്രി ഉജ്ജ്വല യോജനയുടെ എല്ലാ ഗുണഭോക്താക്കൾക്കും സൗജന്യ എൽപിജി സിലിണ്ടറുകൾ വിതരണം ചെയ്യും. ഇതുമായി ബന്ധപ്പെട്ട എല്ലാ നടപടിക്രമങ്ങളും സമയബന്ധിതമായി പൂർത്തിയാക്കണം. ദീപാവലിക്ക് മുമ്പ് എല്ലാ ഗുണഭോക്താക്കളുടെയും വീടുകളിൽ എൽപിജി സിലിണ്ടറുകൾ ലഭ്യമാക്കണം.ആരാധനാലയങ്ങൾക്ക് സമീപം മാംസ, മദ്യശാലകൾ പാടില്ല. നിശ്ചിത കാലയളവിനുള്ളിൽ മാത്രമേ മദ്യശാലകൾ തുറക്കാവൂവെന്നും യോഗി ആദിത്യനാഥ് നൽകിയ ഉത്തരവിൽ പറയുന്നു.