കാണ്‍പുര്‍: ബംഗ്ലാദേശിനെതിരായ രണ്ടാം ക്രിക്കറ്റ് ടെസ്റ്റില്‍ ചരിത്രം കുറിച്ച് ഭാരതം. ആദ്യ ദിവസം വെറും 35 ഓവറും തുടര്‍ന്നുള്ള രണ്ട് ദിവസങ്ങളില്‍ ഒരു പന്തുപോലും എറിയാനും കഴിയാതിരുന്ന മത്സരത്തിന്റെ നാലാം ദിനം ബംഗ്ലാദേശിനെ ഒന്നാം ഇന്നിങ്‌സില്‍ 233 റണ്‍സിന് ഓള്‍ഔട്ടാക്കി. മറുപടി ബാറ്റിങ്ങില്‍ ടി 20 ശൈലിയില്‍ അടിച്ചു തകര്‍ത്ത ഭാരതം 34.3 ഓവറില്‍ ഒന്‍പത് വിക്കറ്റ് നഷ്ടത്തില്‍ 285 റണ്‍സെടുത്ത് ഇന്നിങ്‌സ് ഡിക്ലയര്‍ ചെയ്തു.
ഇതോടെ ഒന്നാം ഇന്നിങ്‌സില്‍ 52 റണ്‍സിന്റെ ലീഡ് നേടി. തുടര്‍ന്ന് രണ്ടം ഇന്നിങ്‌സ് ആരംഭിച്ച ബംഗ്ലാദേശ് നാലാം ദിവസത്തെ കളി നിര്‍ത്തുമ്പോള്‍ രണ്ട് വിക്കറ്റ് നഷ്ടത്തില്‍ 26 റണ്‍സെടുത്തിട്ടുണ്ട്. എട്ട് വിക്കറ്റ് കൈയിലിരിക്കെ സ്ന്ദര്‍ശകര്‍ 26 റണ്‍സ് കൂടി പിന്നിലാണ്.
7 റണ്‍സോടെ ഷദ്മാന്‍ ഇസ്ലാമും റണ്ണൊന്നുമെടുക്കാതെ മോനിമുള്‍ ഹഖും ക്രീസില്‍. നാലു റണ്‍സെടുത്ത നൈറ്റ് വാച്ച്മാന്‍ ഹസന്‍ മെഹ്മൂദിന്റെയും 10 റണ്‍സെടുത്ത സാകിര്‍ ഹസന്റെയും വിക്കറ്റുകളാണ് രണ്ടാം ഇന്നിങ്‌സില്‍ ബംഗ്ലാദേശിന് നഷ്ടമായത്. അശ്വിനാണ് രണ്ട് വിക്കറ്റും. സ്‌കോര്‍ ബംഗ്ലാദേശ് 233, 26/2, ഇന്ത്യ 285/9.
മഴ മാറി നിന്ന നാലാം ദിനം 107-3 എന്ന സ്‌കോറില്‍ ക്രീസിലെത്തിയ ബംഗ്ലാദേശ് മോനിനുള്‍ ഹഖിന്റെ അപരാജിത സെഞ്ചുറിയാണ് സ്‌കോര്‍ 233 റണ്‍സിലെത്തിച്ചത്. മോനിമുളിന് പുറമെ 20 റണ്‍സെടുത്ത മെഹ്ദി ഹസന്‍ മിറാസ് മാത്രമാണ് ഇന്നലെ ബംഗ്ലാദേശിനായി പൊരുതിയത്. ഭാരതത്തിനായി ജസ്പ്രീത് ബുമ്ര മൂന്ന് വിക്കറ്റെടുത്തപ്പോള്‍ അശ്വിനും സിറാജും ആകാശ് ദിപും രണ്ട് വീതവും ജഡേജ ഒരു വിക്കറ്റുമെടുത്തു.
തുടര്‍ന്ന് ആദ്യ ഇന്നിങ്‌സ് ആരംഭിച്ച ഭാരതം ടി 20 ശൈലിയാണ് ബാറ്റ് വീശിയത്. 3.1 ഓവറില്‍ 50 റണ്‍സിലെത്തിയ ഭാരതം ടെസ്റ്റ് ക്രിക്കറ്റിലെ അതിവേഗ ടീം ഫിഫ്റ്റി അടിച്ചെടുത്തു. നേരിട്ട ആദ്യ രണ്ട് പന്തും സിക്‌സിന് പറത്തിയ ക്യാപ്റ്റന്‍ രോഹിത് ശര്‍മ 11 പന്തില്‍ 23 റണ്‍സെടുത്ത് പുറത്തായപ്പോള്‍ 51 പന്തില്‍ 72 റണ്‍സടിച്ച യശസ്വി ജയ്‌സ്വാളും 36 പന്തില്‍ 39 റണ്‍സെടുത്ത ശുഭ്മാന്‍ ഗില്ലും ചേര്‍ന്ന് പതിനൊന്നാം ഓവറിലെ ആദ്യ പന്തില്‍ 100 കടത്തി ടെസ്റ്റ് ചരിത്രത്തില്‍ ഒരു ടീമിന്റെ ഏറ്റവും വേഗമേറിയ ടീം സെഞ്ചുറിയും സ്വന്തമാക്കി. യശസ്വിയും ഗില്ലും (39) പുറത്തായശേഷം റിഷഭ് പന്ത് (9) നിരാശപ്പെടുത്തിയെങ്കിലും കോഹ്‌ലിയും രാഹുലും ചേര്‍ന്ന് ഇന്ത്യയെ അതിവേഗത്തില്‍ 150ഉം 200ഉം കടത്തി. 24.2 ഓവറില്‍ 200ല്‍ എത്തിയപ്പോള്‍ ടെസ്റ്റ് ചരിത്രത്തിലെ ഏറ്റവും വേഗത്തില്‍ ഈ നേട്ടം സ്വന്തമാക്കുന്ന ആദ്യ ടീമെന്നെ ബഹുമതിയും സ്വന്തമാക്കി.
35 പന്തില്‍ 47 റണ്‍സെടുത്ത കോലിയും 43 പന്തില്‍ 68 റണ്‍സെടുത്ത രാഹുലും പുറത്തായതിന് പിന്നാലെ ജഡേജയും (8) അശ്വിനും (1) നിരാശപ്പെടുത്തിയെങ്കിലും ആകാശ് ദീപ് രണ്ട് പടുകൂറ്റന്‍ സിക്‌സുകളിലൂടെ ലീഡ് 50 കടത്തി. ആകാശ് ദീപ് (5 പന്തില്‍ 12) പുറത്തായതിന് പിന്നാലെ 52 റണ്‍സിന്റെ ഒന്നാം ഇന്നിങ്‌സ് ലീഡുമായി ഭാരതം ഇന്നിംഗ്‌സ് ഡിക്ലയര്‍ ചെയ്തു. 34.4 ഓവറില്‍ 8.34 റണ്‍സ് ശരാശരിയിലാണ് ഇന്ത്യ 285 റണ്‍സടിച്ചത്. ബംഗ്ലാദേശിനായി മെഹ്ദി ഹസനും ഷാക്കിബ് അല്‍ ഹസനും നാല് വിക്കറ്റ് വീതം വീഴ്‌ത്തി.
ഇന്ന് ബംഗ്ലാദേശിനെ എത്രയും പെട്ടെന്ന് പുറത്താക്കി വിജയം സ്വന്തമാക്കുക എന്നതാണ് ഭാരതത്തിന്റെ ലക്ഷ്യം.
പ്രതികരിക്കാൻ ഇവിടെ എഴുതുക: