നിലമ്പൂര്: കാല് വെട്ടിയാല് വീല് ചെയറില് വരുമെന്നും വെടിവെച്ച് കൊന്നാലേ രക്ഷയുള്ളൂവെന്നും പറ്റുമെങ്കില് അത് ചെയ്യാനും സിപിഎമ്മിനെ വെല്ലുവിളിച്ച് പി.വി. അന്വര്. നിലമ്പൂരില് ഞായറാഴ്ച വൈകുന്നേരം നടന്ന വിശദീകരണയോഗത്തിലായിരുന്നു പി.വി. അന്വറിന്റെ ഈ കടന്നാക്രമണം.
നിലമ്പൂർ ചന്തക്കുന്നിലായിരുന്നു പി.വി. അന്വറിന്റെ രാഷ്ട്രീയ വിശദീകരണ യോഗം. . കൂത്തുപറമ്പ് സമരനായകൻ പുഷ്പനെ അനുസ്മരിച്ചാണ് അൻവർ പ്രസംഗം തുടങ്ങിയത്. മതം പറഞ്ഞ് തന്നെ വേട്ടയാടുന്നു. തന്നെ വർഗീയവാദിയാക്കാനാണ് ശ്രമം. താൻ അഞ്ചുനേരം നിസ്കരിക്കും എന്ന് പറഞ്ഞതാണ് പ്രശ്നം. കേരള പോലീസിൽ 25 ശതമാനവും ക്രിമിനലുകളാണ്. ക്യാരിയർമാരെ കൊണ്ടുപോയി പോലീസ് സ്വർണം തട്ടുന്നു. തെളിവുകൾ പുറത്തുവിട്ടിട്ടും പോലീസ് അനങ്ങുന്നില്ല. സ്വർണപണിക്കാരൻ പോലും കോടീശ്വരനായി. സ്വർണപണിക്കാരൻ ഉണ്ണിയുടെ സ്വത്തുക്കളെപ്പറ്റി ഇനിയെങ്കിലും അന്വേഷിക്കണമെന്നും അൻവർ ആവശ്യപ്പെട്ടു.
ഇടതുപക്ഷ ബന്ധം അവസാനിപ്പിച്ച് മുന്നണിക്ക് പുറത്തേക്ക് വന്ന നിലമ്പൂര് എംഎല്എ പിവി അന്വറിന്റെ രാഷ്ട്രീയ നിലപാട് പ്രഖ്യാപന യോഗത്തിനു വൻ ജനാവലി. യോഗത്തിന്റെ സ്വാഗത പ്രസംഗം നടത്തിയത് മുന് സിപിഎം ലോക്കല് സെക്രട്ടറി ഇ.എ സുകുവാണ്. അന്വറിനോട് പാര്ട്ടി ചെയ്ത കാര്യങ്ങള് ക്ഷമിക്കാനോ സാധാരണ പ്രവര്ത്തകര്ക്ക് ഉള്ക്കൊള്ളാനോ കഴിയുന്നതല്ലെന്ന് സുകു സ്വാഗത പ്രസംഗത്തിൽ പറഞ്ഞു.
കേരളത്തിലെ പാര്ട്ടിയെ രക്ഷിക്കുന്നതിന് വേണ്ടിയുള്ള കാര്യങ്ങളാണ് അന്വര് സര്ക്കാരിനോടും പിതാവിന്റെ സ്ഥാനത്ത് കണ്ടിരുന്ന മുഖ്യമന്ത്രി പിണറായി വിജയനോടും പറഞ്ഞത്. എന്നാല് അതില് നടപടി സ്വീകരിക്കുന്നതിന് പകരം അന്വറിനെ ഞെക്കി കൊല്ലാനാണ് പാര്ട്ടിയും സര്ക്കാരും ശ്രമിച്ചതെന്ന് ഇ.എ സുകു ആരോപിച്ചു. തന്റെ എംഎല്എ ഒരു പരാതി പറഞ്ഞിട്ട് പോലും അത് കേള്ക്കാന് തയ്യാറാകാത്ത മുഖ്യമന്ത്രി എന്ത് സന്ദേശമാണ് നല്കുന്നതെന്നും മുന് സിപിഎം നേതാവ് ചോദിച്ചു.
‘നിലമ്പൂരിലെ ഇടത് മുന്നണി പ്രവര്ത്തകരുടെ ആവേശവും അഭിമാനവുമായ അന്വറിനെ ഇല്ലായ്മ ചെയ്യാന് ശ്രമിച്ചാല് സഖാക്കള് അതിന് അനുവദിക്കില്ല. ഒന്നാം പിണറായി സര്ക്കാര് മികച്ചതായിരുന്നുവെന്നും എന്നാല് ഇപ്പോള് സ്ഥിതി അതല്ല. ഒരു സിപിഎം നേതാവെന്ന് പറഞ്ഞ് സ്റ്റേഷനില് ഒരു ആവശ്യത്തിന് എത്തിയാല് രണ്ട് അടി കൂടുതല് കിട്ടുന്ന സാഹചര്യമുണ്ടെന്നും’- അദ്ദേഹം പറഞ്ഞു.
