ഡൽഹിയിൽ മദ്യക്കടത്ത് സംഘം കോൺസ്റ്റബിളിനെ കാർ ഇടിച്ചു വീഴ്‌ത്തി , പത്ത് മീറ്ററോളം വലിച്ചിഴച്ചു ; ദാരുണാന്ത്യം

ന്യൂഡൽഹി : രാജ്യതലസ്ഥാനമായ ഡൽഹിയിൽ പൊലീസ് കോൺസ്റ്റബിളിനെ കാർ ഇടിച്ചു വീഴ്‌ത്തി ക്രൂരമായി കൊലപ്പെടുത്തി മദ്യക്കടത്ത് സംഘം. ഇന്ന് പുലർച്ചെ നംഗ്ലോയിയിലെ ചെക്ക് പോയിൻ്റിലാണ് സംഭവം . സന്ദീപ് എന്ന കോൺസ്റ്റബിളാണ് കൊല്ലപ്പെട്ടത് . കാർ ഇടിച്ച് വീണ കോൺസ്റ്റബിളിനെ 10 മീറ്റർ ദൂരത്തേക്ക് വലിച്ചിഴക്കുകയും ചെയ്തു. സംഭവത്തിൽ ഗുരുതരമായി പരിക്കേറ്റ കോൺസ്റ്റബിൾ ചികിത്സയിലിരിക്കെ മരണപ്പെട്ടു

കാറിൽ വൻതോതിൽ മദ്യവുമായി നംഗ്ലോയ് മേഖലയിൽ നിന്ന് മദ്യക്കടത്തുകാര് പോകുന്നതായി രഹസ്യ വിവരം ലഭിച്ച പോലീസ് സംഘം റെയ്ഡ് നടത്തുകയായിരുന്നു. ഇതിനിടെ, ചെക്ക്‌പോസ്റ്റിൽ നിയോഗിക്കപ്പെട്ട കോൺസ്റ്റബിൾ സന്ദീപ് സംശയാസ്‌പദമായ രീതിയിൽ ഒരു കാർ കണ്ടപ്പോൾ നിർത്താൻ ആവശ്യപ്പെട്ടു.

എന്നാൽ മദ്യക്കടത്ത് സംഘം സന്ദീപിനെ ഇടിച്ചു വീഴ്‌ത്തുകയായിരുന്നു.ഇതിന് ശേഷം ഇതേ വേഗതയിൽ 10 മീറ്ററോളം കോൺസ്റ്റബിളിനെ വലിച്ചിഴച്ചു. ഇതിന് പിന്നാലെ സന്ദീപ് റോഡിൽ വീണു.

സംഭവത്തിൽ കോൺസ്റ്റബിൾ സന്ദീപിന് ഗുരുതരമായി പരിക്കേറ്റതായി പോലീസ് പറഞ്ഞു. ഉടൻ തന്നെ ആശുപത്രിയിൽ എത്തിച്ചെങ്കിലും ചികിത്സയിലിരിക്കെ മരിച്ചു. സംഭവവുമായി ബന്ധപ്പെട്ട് കാർ ഡ്രൈവർക്കെതിരെ കേസെടുത്തതായും ഇയാൾക്കായി തിരച്ചിൽ ആരംഭിച്ചതായും പോലീസ് ഉദ്യോഗസ്ഥർ അറിയിച്ചു. സംഭവസ്ഥലത്ത് സ്ഥാപിച്ച സിസിടിവി ക്യാമറകളിലെ ദൃശ്യങ്ങൾ പരിശോധിച്ച് പ്രതികളെ കണ്ടെത്താനുള്ള ശ്രമത്തിലാണ്.