പഞ്ചാബിൽ ചൈൽഡ് പോണോഗ്രഫി റാക്കറ്റിലെ പ്രധാനി പിടിയിൽ . ഫാസിൽക ജില്ല രാംസര ഗ്രാമവാസിയായ വിജയ്പാൽ ആണ് പിടിയിലായത് . റാക്കറ്റുമായി ബന്ധപ്പെട്ട 54 പേരെ പിടികൂടാനുള്ള നടപടികൾ പോലീസ് ആരംഭിച്ചു.ഇതിനായി വിവിധ പോലീസ് സംഘങ്ങൾ ഇതര സംസ്ഥാനങ്ങളിൽ റെയ്ഡ് നടത്തുന്നുണ്ട്. ഓൺലൈൻ പ്ലാറ്റ്ഫോമുകളിലൂടെ കുട്ടികളുടെ അശ്ലീലചിത്രങ്ങൾ കാണുകയും , കൈവശം വയ്ക്കുകയും ഫോർവേഡ് ചെയ്യുകയും ചെയ്യുന്ന പ്രവർത്തനങ്ങളിൽ ഏർപ്പെട്ടിരിക്കുന്ന സംഘമാണിത്.
പ്രതിയിൽ നിന്ന് ഇലക്ട്രോണിക് ഉപകരണങ്ങളും പോലീസ് സംഘം പിടിച്ചെടുത്തിട്ടുണ്ട്. കുട്ടികളെ ലൈംഗികമായി ചൂഷണം ചെയ്യുന്നതുമായി ബന്ധപ്പെട്ട കാര്യങ്ങൾ കാണുന്നതും കൈവശം വയ്ക്കുന്നതും കൈമാറുന്നതും അത് റിപ്പോർട്ട് ചെയ്യാതിരിക്കുന്നതും ലൈംഗിക കുറ്റകൃത്യങ്ങളിൽ നിന്ന് കുട്ടികളെ സംരക്ഷിക്കുന്ന (പോക്സോ) നിയമത്തിന്റെ ലംഘനമാണെന്ന് അടുത്തിടെ സുപ്രീം കോടതി പറഞ്ഞിരുന്നു. അതിനു പിന്നാലെയാണ് വൻ റാക്കറ്റിലെ പ്രധാന കണ്ണി വലയിലാകുന്നത് .
