ഭുജ് : സോഷ്യൽ മീഡിയ വഴി അടുപ്പത്തിലായ യുവതിയെ കാണാൻ അതിർത്തി കടന്ന് പാകിസ്ഥാനിലേക്ക് പോകാൻ ശ്രമിച്ച കശ്മീരി യുവാവിനെ ഗുജറാത്ത് പോലീസ് പിടികൂടി. കച്ച് ജില്ലയിലെ ഖവ്ദ ഗ്രാമത്തിൽ എത്തിയ ജമ്മു കശ്മീരിൽ നിന്നുള്ള 36 കാരനായ ബന്ദിപ്പോര സ്വദേശി ഇംതിയാസ് ഷെയ്ഖാണ് പോലീസ് പിടിയിലായത്.
പോലീസ് പറയുന്നതനുസരിച്ച് സോഷ്യൽ മീഡിയ വഴി പാകിസ്ഥാനിലെ മുൾട്ടാണിൽ നിന്നുള്ള ഒരു യുവതിയുമായി ഇയാൾ അടുപ്പത്തിലായി. തുടർന്ന് യുവതിയെ കാണണമെന്ന അതിയായ ആഗ്രഹത്തോടെയാണ് ഇയാൾ കച്ചിലേക്ക് യാത്ര ചെയ്തത്.
കച്ച് അതിർത്തി വഴി നിയമപരമായി പാകിസ്ഥാനിൽ പ്രവേശിക്കാൻ കഴിയുമെന്ന് വിശ്വസിച്ച ഷെയ്ഖ് അധികാരികളിൽ നിന്ന് അനുമതി നേടുന്നതിന് കച്ചിലെ ഖവ്ദ പ്രദേശത്ത് എത്തി. ഇവിടെ അതിർത്തി കടക്കാൻ പ്രദേശവാസികളുടെ സഹായം തേടുകയും ചെയ്തു.
എന്നാൽ ഗ്രാമവാസികൾ ഇക്കാര്യം പോലീസിനെ അറിയിച്ചതിനെത്തുടർന്ന് ഷെയ്ഖിനെ സ്റ്റേഷനിലേക്ക് കൊണ്ടുവന്നു കാര്യങ്ങൾ ചോദിച്ചറിഞ്ഞു. പ്രാഥമികാന്വേഷണം നടത്തി ഷെയ്ഖിന്റെ കുടുംബവുമായും ജമ്മു കശ്മീരിലെ ലോക്കൽ പോലീസുമായും വസ്തുതകൾ പരിശോധിച്ച ശേഷം യാതൊരു ഭീഷണിയുമില്ലെന്ന് അധികൃതർ മനസിലാക്കി വൈകുന്നേരം ഇയാളെ തിരികെ ജമ്മുവിലേക്ക് തന്നെ വിട്ടയയ്‌ക്കുകയും ചെയ്തു.
കാശ്മീരിൽ നിന്നുള്ള യാത്ര സാധ്യമല്ലാത്തതിനാൽ എളുപ്പമുള്ള വഴി തേടിയാണ് ഷെയ്ഖ് കച്ച് അതിർത്തി തിരഞ്ഞെടുത്തതെന്ന് ഇൻസ്പെക്ടർ എം.ബി ചൗഹാൻ പറഞ്ഞു.
പ്രതികരിക്കാൻ ഇവിടെ എഴുതുക: