തിരുവനന്തപുരം: ലൈംഗിക പീഡന പരാതിയിൽ എം. മുകേഷ് എം.എൽ.എ രാജിവയ്ക്കേണ്ടതില്ലെന്ന് വനിതാ കമ്മിഷൻ അധ്യക്ഷ പി. സതീദേവി. കേസിൽ ശിക്ഷിച്ചാൽ മാത്രം ജനപ്രതിനിധി രാജി വച്ചാൽ മതി. ഇപ്പോൾ ആരോപണം മാത്രമാണ് വന്നിട്ടുള്ളത്. എം.എൽ.എ ഏത് സാഹചര്യത്തിലാണ് രാജി വയ്ക്കേണ്ടതെന്ന് നിയമ സംവിധാനത്തിൽ പറയുന്നുണ്ടെന്നും സതീദേവി പറഞ്ഞു.
തുടക്കം മുതൽ തന്നെ വനിതാ കമ്മിഷൻ WCCയുടെ പരാതിയിൽ നടപടികൾ എടുത്തിട്ടുണ്ടെന്നും വനിതാ കമ്മിഷൻ അധ്യക്ഷ പറഞ്ഞു. കഴിഞ്ഞ ദിവസം മുകേഷിനെ പിന്തുണയ്ക്കാതെയാണ് സിപിഎം നേതാവ് പി. കെ ശ്രീമതി നിലപാട് വ്യക്തമാക്കിയത്. എംഎൽഎ സ്ഥാനത്ത് നിന്ന് രാജി വെയ്ക്കന്നതുമായി ബന്ധപ്പെട്ട തീരുമാനം എടുക്കേണ്ടത് മുകേഷാണെന്നും ധാർമികമായി അവനവനാണ് ഇക്കാര്യം തീരുമാനിക്കേണ്ടതെന്നും പി.കെ ശ്രീമതി പറഞ്ഞു. രാജി വേണ്ടെന്ന് സിപിഎം തീരുമാനിച്ചിരിക്കെയാണ് മുകേഷിനെ വെട്ടിലാക്കുന്ന നിലപാടുമായാണ് ശ്രീമതി രംഗത്തെത്തിയത്.
ആലുവ സ്വദേശിനിയായ നടിയുടെ പരാതിയിൽ മരട് പോലീസ് രജിസ്റ്റർ ചെയ്ത കേസിലാണ് മുകേഷ് ചോദ്യം ചെയ്യലിന് ഹാജരായതും അറസ്റ്റ് ചെയ്ത് ജാമ്യത്തിൽ വിട്ടതും. സിനിമയിൽ അവസരം നൽകാമെന്നും താരസംഘടനയായ അമ്മയിൽ അംഗത്വം നൽകാമെന്നും പറഞ്ഞ് മരടിലെ വില്ലയിലേക്ക് വിളിച്ചു വരുത്തി ഉപദ്രവിച്ചെന്ന നടിയുടെ പരാതിയിലാണ് മുകേഷിനെതിരെ കേസ് എടുത്തത്.
ലൈംഗികാരോപണം ഉയർന്നതിനാൽ മാത്രം മുകേഷ് എംഎൽഎ സ്ഥാനം രാജിവെയ്ക്കേണ്ടതില്ലെന്ന നിലപാടാണ് സിപിഎം തുടക്കം മുതൽ സ്വീകരിച്ചിരുന്നത്.
