ആലുവ : പെരുമ്പാവൂരിൽ മധ്യവയസ്ക്കനെ കൊലപ്പെടുത്തിയ കേസിൽ രണ്ട് പേർ അറസ്റ്റിൽ. മാറമ്പിള്ളി പള്ളിപ്രം പള്ളിക്കവല ഭാഗത്ത് നെടിയാൻ വീട്ടിൽ അജിംസ് (35), പള്ളിക്കവല ഈരേത്ത് വീട്ടിൽ ഷെഫീർ (ബാവ 47 ) എന്നിവരെയാണ് പെരുമ്പാവൂർ പോലീസ് അറസ്റ്റ് ചെയ്തത്.
മുടിക്കൽ ചിറയംപാടം ഭാഗത്ത് വടക്കേക്കുടി വീട്ടിൽ ഷംസുദീൻ (49) ആണ് കൊല്ലപ്പെട്ടത്. കഴിഞ്ഞ 14 ന് പെരുമ്പാവൂർ ബീവറേജിന് സമീപം അജിംസും ഷംസുദീനും തമ്മിൽ വാക്കേറ്റവും തുടർന്ന് സംഘട്ടനവും ഉണ്ടായിരുന്നു. 23 ന് ഉച്ചയ്ക്ക് പെരുമ്പാവൂരിലുള്ള ബാറിൽ നിന്നും ഷംസുദീനെ, ഷെഫീർ കാറിൽക്കയറ്റി ബീവറേജിന് സമീപത്തെത്തിച്ചു.
അവിടെ നിന്ന് മദ്യം കഴിക്കുകയും വാക്ക് തർക്കം ഉണ്ടാവുകയും ചെയ്തു. ഇത് കണ്ട് അജിംസ് അവിടെ നിൽപ്പുണ്ടായിരുന്നു. വാക്ക് തർക്കത്തിന് ശേഷം നടന്ന് പോവുകയായിരുന്ന ഷംസുദീനെ പിന്നിൽ നിന്നെത്തിയ അജിംസ് സ്റ്റീൽ പൈപ്പ് കൊണ്ട് അടിച്ചു വീഴ്ത്തുകയായിരുന്നു.
തുടർന്ന് കരിങ്കല്ലു കൊണ്ടും ആക്രമിച്ചു. ഈ സമയം ഷെഫീർ ആക്രമിക്കാൻ വിളിച്ചു പറഞ്ഞു കൊണ്ടിരുന്നു. ആശുപത്രിയിലെത്തിയ ശേഷം മരണമടഞ്ഞു. സംഭവം നടന്നയുടനെ പോലീസ് പ്രതികളെ പിടികൂടി. ഷെഫീർ റൗഡി ലിസ്റ്റിൽ ഉൾപ്പെട്ടയാളാണ്. മയക്കുമരുന്ന് ഉൾപ്പടെ നിരവധി കേസുകളിലും പ്രതിയാണ്.
കോടനാട് ഇൻസ്പെക്ടർ ജി.പി. മനു രാജ്, എസ്.ഐമാരായ റിൻസ്. എം തോമസ്, പി. എം. റാസിഖ്, എൻ.ഡി. ആൻ്റോ , ഷിബു മാത്യു , സീനിയർ സിപിഒ എം. ബി. ജയന്തി തുടങ്ങിയവരാണ് അന്വേഷണം സംഘത്തിലുള്ളത്.
