തിരുവനന്തപുരം: പെലാജിക് വല ഉള്‍പ്പെടെയുള്ള അനധികൃത വലകള്‍ ഉപയോഗിച്ചുള്ള മത്സ്യബന്ധനത്തിനെതിരെ കര്‍ശന നടപടികള്‍ സ്വീകരിക്കുമെന്ന് ഫിഷറീസ് ഡയറക്ടര്‍ അറിയിച്ചു.
നിരോധിത പെലാജിക് വല ഉപയോഗിച്ച് ട്രോള്‍ബോട്ടുകളും അനധികൃത വലകള്‍ ഉപയോഗിച്ച് പരമ്പരാഗത മത്സ്യബന്ധന യാനങ്ങളും വ്യാപകമായി മത്സ്യബന്ധനം നടത്തുന്നതായി സര്‍ക്കാരിന്റെ ശ്രദ്ധയില്‍പ്പെട്ടിട്ടുണ്ട്. പെലാജിക്ക് വല ഉള്‍പ്പെടെയുള്ള നിരോധിത വലകളുടെ നിര്‍മ്മാണം, സൂക്ഷിക്കല്‍, ഗതാഗതം എന്നിവ കേരള മത്സ്യബന്ധന നിയന്ത്രണ നിയമം വകുപ്പ് 4 ഉപവകുപ്പ് (1) പരിച്ഛേദം (ഇ) പ്രകാരം നിരോധിച്ചിട്ടുണ്ട്.
ചെറുമത്സ്യങ്ങള്‍ ഉള്‍പ്പെടെ സംരക്ഷിക്കപ്പെടേണ്ട മത്സ്യങ്ങള്‍ക്ക് വളരെയേറെ നാശം വരുത്തുന്ന ആയതിനാലാണ് പെലാജിക് വല ഉപയോഗിച്ചുള്ള മത്സ്യബന്ധനം നിരോധിച്ചിരിക്കുന്നത്. ഈ വലകള്‍ ബോട്ടില്‍ അല്ലെങ്കില്‍ വള്ളത്തില്‍ സൂക്ഷിക്കുകയോ ഉപയോഗിക്കുകയോ ചെയ്യുന്ന യാനങ്ങള്‍ക്കെതിരെ 2.5 ലക്ഷം രൂപ വരെ പിഴ ഈടാക്കുകയും ബോട്ടിലുള്ള മത്സ്യം ലേലം ചെയ്ത് തുക സര്‍ക്കാരിലേയ്‌ക്ക് അടക്കുകയും ചെയ്യും. നിയമലംഘനം നിയന്ത്രണാതീതമാകുന്ന സാഹചര്യത്തില്‍ യാനത്തിന്റെ ലൈസന്‍സ്/സ്‌പെഷ്യല്‍ പെര്‍മിറ്റ് റദ്ദ് ചെയ്യുകയോ രജിസ്‌ട്രേഷന്‍ റദ്ദുചെയ്യുകയോ ചെയ്യുന്നതാണ്. നിരോധിത വലകള്‍ നിര്‍മിക്കുന്ന സ്ഥാപനങ്ങള്‍ക്കും വ്യക്തികള്‍ക്കും എതിരെ കര്‍ശനമായ നിയമ നടപടികള്‍ സ്വീകരിക്കും.
പെലാജിക് വല ഉള്‍പ്പെടെയുള്ള നിരോധിത വലകളോ അനധികൃത വലകളോ സൂക്ഷിക്കുകയോ, ഉപയോഗിക്കുകയോ ചെയ്യുന്ന യാനങ്ങളെ കണ്ടെത്തുന്നതിനായി ഫിഷറീസ്, മറൈന്‍ എന്‍ഫോഴ്‌സ്‌മെന്റ്, കോസ്റ്റല്‍ പോലീസ്, ഇന്ത്യന്‍ കോസ്റ്റ് ഗാര്‍ഡ് എന്നിവര്‍ സംയുക്തമായി ഹാര്‍ബറുകളിലും കടലിലും വ്യാപകമായ പരിശോധനകള്‍ നടത്തുന്നതും അത്തരം യാനങ്ങളെ കണ്ടുകെട്ടി കര്‍ശനമായ നിയമനടപടി എല്ലാ ജില്ലകളിലും സ്വീകരിക്കും.
പ്രതികരിക്കാൻ ഇവിടെ എഴുതുക: