മലപ്പുറം: പി.വി. അന്വര് ഉന്നയിച്ച ആരോപണങ്ങള് മുഖ്യമന്ത്രി പിണറായി വിജയന് തള്ളിപ്പറഞ്ഞതിന് പിന്നാലെ അന്വറിന് മുസ്ലിം ലീഗിലേക്ക് ക്ഷണം. മുസ്ലിം ലീഗ് നിലമ്പൂര് മണ്ഡലം പ്രസിഡന്റ് ഇക്ബാല് മുണ്ടേരിയാണ് ഫെയ്സ് ബുക്കിലൂടെ അന്വറിനെ പാര്ട്ടിയിലേക്ക് സ്വാഗതം ചെയ്തത്.
അന്വര് പറയുന്ന പലകാര്യങ്ങളും സത്യമാണെന്നും സ്വാതന്ത്ര്യസമരസേനാനിയായ ഷൗക്കത്ത് അലി സാഹിബിന്റെ മകന് പി.വി. അന്വറിന്റെ യഥാര്ഥ മുഖം ഇനിയാണ് പിണറായി വിജയന് കാണേണ്ടതെന്നും അദ്ദേഹം കുറിപ്പില് പറയുന്നു. പി.വി. അന്വര് പറയുന്ന സത്യങ്ങള് അംഗീകരിക്കാന് പിണറായി വിജയന് കഴിയില്ല. അതിന് പല കാരണങ്ങളും ഉണ്ട്. അന്വര് പെട്ടെന്ന് ആര്ക്ക് മുന്നിലും വഴങ്ങുന്ന പ്രകൃതക്കാരനല്ലെന്നും ഫെയ്സ്ബുക്ക് പോസ്റ്റിലൂടെ ഇഖ്ബാല് മുണ്ടേരി പറയുന്നു.
എന്നാല് പോസ്റ്റ് വിവാദമായതോടെ ഇഖ്ബാല് ഫെയ്സ്ബുക്ക് പോസ്റ്റ് പിന്വലിച്ചു. പോസ്റ്റിനെ കുറിച്ച് അറിയില്ലെന്നാണ് ലീഗ് നേതാവ് പി.കെ. കുഞ്ഞാലിക്കുട്ടിയുടെ പ്രതികരിച്ചത്.
