ആഗ്ര: തുടര്ച്ചയായ കനത്ത മഴയിൽ താജ്മഹലിന്റെ കുംഭഗോപുരത്തിൽ ചോർച്ച. താജ്മഹലിന്റെ പ്രധാന ഗോപുരത്തിലാണ് ചോർച്ച കാണുന്നത്. ചരിത്രസ്മാരകത്തിന്റെ മേൽനോട്ട-പരിപാലന ചുമതലയുള്ള ആർക്കിയോളജിക്കൽ സർവ്വേ ഓഫ് ഇന്ത്യ സ്ഥലത്ത് ഒരു ഉദ്യോഗസ്ഥനെ നിരീക്ഷണത്തിനായി നിയോഗിച്ചിട്ടുണ്ട്. കുംഭഗോപുരത്തിൽ ഏത് ഭാഗത്താണ് ചോർച്ചയുള്ളതെന്ന് മനസ്സിലാക്കാൻ കഴിഞ്ഞിട്ടില്ല. ഇത് തിരിച്ചറിയാനുള്ള അന്വേഷണത്തിന് ഉത്തരവിട്ടുട്ടുണ്ടെന്ന് ആർക്കിയോളജിക്കൽ സർവ്വേ ഓഫ് ഇന്ത്യയിലെ ആർക്കിയോളജിസ്റ്റ് സൂപ്രണ്ട് രാജ്കുമാർ പട്ടേൽ അറിയിച്ചു.
റിപ്പോർട്ടുകൾ പ്രകാരം താജ്മഹലിനകത്ത് കാര്യമായി വെള്ളം ചോർന്നു വീഴുന്നുണ്ട്. ഇങ്ങനെ ചോരുന്ന വെള്ളം മുംതാസ് മഹലിന്റെയും ഷാജഹാൻ ചക്രവർത്തിയുടെയും ശവകുടീരങ്ങൾക്കടുത്തേക്ക് വെള്ളം ഒലിച്ചെത്തിയിട്ടുണ്ട്. അതിശക്തമായ മഴയാണ് സ്ഥലത്ത് പെയ്തു കൊണ്ടിരിക്കുന്നത്. വരുന്ന ദിവസങ്ങളിലും നല്ല മഴ ലഭിക്കുമെന്ന് കാലാവസ്ഥാ വകുപ്പ് അറിയിച്ചിട്ടുണ്ട്. വ്യാഴാഴ്ച മാത്രം 151 എംഎം മഴയാണ് ലഭിച്ചത്. കഴിഞ്ഞ എമ്പത് വർഷത്തിനിടയിൽ ഇത്രയും ശക്തമായ മഴ ഇതാദ്യമാണ്.
1982ൽ ലോകപൈതൃക സ്ഥാനമായി യുനെസ്കോ അംഗീകരിച്ച കെട്ടിടമാണ് താജ്മഹൽ. 1631ൽ സ്ഥാപിക്കപ്പെട്ട ഈ ചരിത്രസ്മാരകം പലതവണ ചെറിയ കേടുപാടുകൾ സംഭവിക്കുകയും അവ പരിഹരിക്കുകയും ചെയ്തിട്ടുണ്ട്. 1652ലാണ് താജ്മഹലിൽ ആദ്യത്തെ കേടുപാട് തിരിച്ചറിയുന്നത്. അന്നത്തെ ചക്രവർത്തി ഔറംഗസേബ് ഇക്കാര്യം ചൂണ്ടിക്കാട്ടി എഴുതിയ കത്ത് പിൽക്കാലത്ത് കണ്ടെടുത്തിരുന്നു. ഇതിലും പ്രധാന കുംഭഗോപുരത്തിൽ ചെറിയ വിള്ളലുകളുണ്ടെന്നാണ് കണ്ടെത്തിയിരിക്കുന്നത്.
വളരെ ഗുരുതരമായ പ്രശ്നങ്ങൾ കുംഭഗോപുരത്തിന് ഉണ്ടെന്ന് ആർക്കിയോളജിക്കൽ സർവ്വേ ഓഫ് ഇന്ത്യ കരുതുന്നില്ല. വളരെ ചെറിയ വിള്ളലുകൾ ഗോപുരത്തിലുണ്ടാകാം. അതിശക്തമായ മഴ പെയ്തപ്പോൾ അതിലൂടെ വെള്ളം ഒലിച്ചിറങ്ങുന്നതാകാമെന്നാണ് കരുതുന്നത്.
.
