കൊച്ചി:സിനിമാ നയ രൂപീകരണ സമിതിയില് നിന്ന് ബി ഉണ്ണികൃഷ്ണനെ ഒഴിവാക്കണമെന്നാവശ്യപ്പെട്ട് സംവിധായകന് വിനയന് ഹൈക്കോടതിയില്. തൊഴില് നിഷേധത്തിന് കോമ്പറ്റീഷന് കമ്മീഷന് പിഴയിട്ട വ്യക്തിയെ സമിതിയില് ഉള്പ്പെടുത്തരുത് എന്നാവശ്യപ്പെട്ടാണ് ഹര്ജി.
അതേസമയം,സിനിമാ നയ രൂപീകരണ സമിതിയില് നിന്ന് ഒഴിവാക്കണമെന്ന് സര്ക്കാരിനോട് ആവശ്യപ്പെട്ടെന്ന് ബി ഉണ്ണികൃഷ്ണന് പ്രതികരിച്ചു. നയരൂപീകരണ സമിതിയില് ഉണ്ണികൃഷ്ണന്റെ പേര് ഉള്പ്പെട്ടതില് വിനയന് ഉള്പ്പെടെ വിമര്ശനം ഉയര്ത്തിയിരുന്നു. തുടര്ന്നാണ് ഉണ്ണികൃഷ്ണന്റെ നീക്കം.
അതിനിടെ ,അമ്മയുടെ പ്രവര്ത്തനം തൊഴിലാളി സംഘടന രൂപത്തിലേക്ക് മാറ്റാന് സഹായം തേടി അമ്മയിലെ ഇരുപതോളം അംഗങ്ങള് സമീപിച്ചെന്ന് ബി ഉണ്ണികൃഷ്ണന് പറഞ്ഞു. ഫെഫ്കയില് അഫിലിയേഷന് വേണമെന്നായിരുന്നു ആവശ്യം.എന്നാല് അത് സാധ്യമല്ലെന്ന് അറിയിച്ചു.
ഹേമ കമ്മിറ്റി റിപ്പോര്ട്ട് വിവാദമായതിന് പിന്നാലെ താര സംഘടനയായ അമ്മയുടെ എക്സിക്യൂട്ടീവ് കമ്മിറ്റി ഒന്നടങ്കം രാജിവച്ചിരുന്നു. താര സംഘടനയായ അമ്മയില് ചേരിതിരിവ് രൂക്ഷമാണെന്നും വാര്ത്തകള് വന്നിരുന്നു. ഇതിന് പിന്നാലെയാണ് സിനിമയിലെ സാങ്കേതിക പ്രവര്ത്തകരുടെ സംഘടനയായ ഫെഫ്ക ജനറല് സെക്രട്ടറിയുടെ വെളിപ്പെടുത്തല്.
അമ്മ ചാരിറ്റബിള് സൊസൈറ്റി ആക്ട് പ്രകാരമാണ് രജിസ്റ്റര് ചെയ്തിട്ടുളളത്. അതില് ഒരു വിഭാഗം അതിനെ തൊഴിലാളി സംഘടനയായി മാറ്റണം എന്ന ആവശ്യം ഉന്നയിച്ചതായാണ് വെളിപ്പെടുത്തല് ഉണ്ടായിരിക്കുന്നത്.
അതേ സമയം അമ്മയുടെ ഭാരവാഹികളായ ആരും ഫെഫ്കയെ സമീപിച്ചിട്ടില്ല എന്ന് മുന് വൈസ് പ്രസിഡന്റ് ജയന് ചേര്ത്തല പറഞ്ഞു. അമ്മ ചാരിറ്റബിള് പ്രസ്ഥാനമായി തന്നെ തുടരും. പുതിയ ഭാരവാഹികളെ തെരഞ്ഞെടുക്കുകയാണ് അടുത്ത ലക്ഷ്യമെന്നും ജയന് ചേര്ത്തല പറഞ്ഞു.
