തിരുവനന്തപുരം: വിവാദങ്ങള്ക്കിടെ അവധി അപേക്ഷ പിന്വലിച്ച് എഡിജിപി എം.ആര്. അജിത് കുമാര് സര്ക്കാരിന് കത്ത് നല്കി. 14 മുതല് 17 വരെ കുടുംബവുമായി ചെന്നൈയിലേയ്ക്ക് പോകാനായിരുന്നു അവധി അപേക്ഷ നല്കിയത്.
പോലീസ് തലപ്പത്ത് വന് അഴിച്ചുപണികള് നടന്നതിന് പിന്നാലെയാണ് അജിത് കുമാര് അവധി പിന്വലിക്കാന് അപേക്ഷ നല്കിയത്. പോലീസിനെതിരെ പി.വി. അന്വര് എംഎല്എയാണ് ഗുരുതര ആരോപണങ്ങള് ഉന്നയയിച്ചത്. ഇതിനെ തുടര്ന്നാണ് മലപ്പുറം ജില്ലാ പോലീസ് മേധാവി എസ്. ശശിധരന് അടക്കമുള്ള ഉന്നത പോലീസ് ഉദ്യോഗസ്ഥര്ക്ക് സ്ഥാനചലനമുണ്ടായത്. എന്നാല് ആരോപണ വിധേയനായ അജിത്കുമാര് തല്സ്ഥാനത്ത് തുടരുകയാണ്. ആരോപണങ്ങളുയര്ന്നപ്പോള് തന്നെ എം.ആര്. അജിത്കുമാറിനെ ക്രമസമാധാന വിഭാഗത്തില്നിന്ന് മാറ്റണമെന്ന ആവശ്യം ഉയര്ന്നിരുന്നു. ഇതിനായി പോലീസ് മേധാവിയുടെ ഓഫീസില് നിന്ന് കുറിപ്പും തയ്യാറാക്കിയിരുന്നു. എന്നാല്, മുഖ്യമന്ത്രിയുമായി പോലീസ് മേധാവി നടത്തിയ ചര്ച്ചയ്ക്കുശേഷമാണ് മാറ്റേണ്ടതില്ലെന്ന തീരുമാനത്തിലേക്കെത്തിയത്. അവധിയില് പ്രവേശിക്കുന്ന അദ്ദേഹം മടങ്ങിയെത്തും മുന്പ് പോലീസ് മേധാവിയുടെ നേതൃത്വത്തിലുള്ള അന്വേഷണ സംഘത്തിന്റെ റിപ്പോര്ട്ട് സമര്പ്പിക്കാനുള്ള സാധ്യതയുമുണ്ട്.
അന്വറിന്റെ മൊഴി പോലീസ് മേധാവിയുടെ കൈവശമെത്തിയാലുടന് അത് പരിശോധിച്ച് അന്തിമറിപ്പോര്ട്ട് തയ്യാറാക്കിയേക്കുമെന്ന സൂചനയുമുണ്ട്.
