കോഴിക്കോട്: മികച്ച സേവനപ്രവര്ത്തകര്ക്കുള്ള ബിജെപി മുന് സംഘടനാ ജനറല് സെക്രട്ടറി പി.പി. മുകുന്ദന്റെ പേരിലുള്ള പ്രഥമ സേവാപുരസ്കാരം കേന്ദ്രമന്ത്രി സുരേഷ് ഗോപിക്ക്. പി.പി. മുകുന്ദന്റെ ഓര്മകള്ക്ക് ശ്രദ്ധാഞ്ജലി അര്പ്പിച്ചു കോഴിക്കോട്ട് നടത്തുന്ന വന്ദേമുകുന്ദം പരിപാടിയില് ഗോവ ഗവര്ണര് പി.എസ്. ശ്രീധരന് പിള്ള അവാര്ഡ് സമ്മാനിക്കും.
25,000 രൂപയും പ്രശസ്തി പത്രവും അടങ്ങുന്നതാണ് പുരസ്കാരം. 13ന് രാവിലെ 11ന് കല്ലായി റോഡിലുള്ള സ്നേഹാഞ്ജലി ഓഡിറ്റോറിയത്തിലാണ് ചടങ്ങ്. സാമൂഹികസേവനരംഗത്ത് രാഷ്ട്രീയത്തിനതീതമായ സേവനം കാഴ്ചവച്ചതിനാലാണ് സുരേഷ് ഗോപിയെ പുരസ്കാരത്തിന് തെരഞ്ഞെടുത്തതെന്ന് പി.പി. മുകുന്ദന് അനുസ്മരണ സമിതി കണ്വീനര് അഡ്വ. കെ.വി. സുധീര്, പ്രൊഫ. സുമതി ഹരിദാസ്, ടി. അനൂപ് കുമാര്, പി. ഉണ്ണികൃഷ്ണന് എന്നിവര് വാര്ത്താസമ്മേളനത്തില് അറിയിച്ചു.
