ബെംഗളൂരു: കേരള സര്‍ക്കാര്‍ ഇലക്ട്രോണിക്സ്, വിവരസാങ്കേതികവിദ്യ വകുപ്പിനുകീഴിലുള്ള സ്വതന്ത്ര സോഫ്റ്റ്വെയര്‍ – ഹാര്‍ഡ്വെയര്‍ ഗവേഷണ സ്ഥാപനമായ ഐസിഫോസും ഇന്ത്യന്‍ കൗണ്‍സില്‍ ഓഫ് അഗ്രികള്‍ച്ചറല്‍ റിസര്‍ച്ചിനു കീഴിലുള്ള ഹോര്‍ട്ടികള്‍ച്ചറല്‍ രംഗത്തെ പ്രമുഖ ഗവേഷണ സ്ഥാപനമായ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ഹോര്‍ട്ടികള്‍ച്ചറല്‍ റിസര്‍ച്ചും സഹകരിച്ചുള്ള പ്രവര്‍ത്തനങ്ങള്‍ക്ക് ധാരണാപത്രം ഒപ്പുവെച്ചു. സ്വതന്ത്ര ഹാര്‍ഡ്വെയര്‍, ഐഒടി, കാലാവസ്ഥ നിരീക്ഷണം, എംല്‍/എഐ തുടങ്ങിയ സാങ്കേതിക മേഖലയിലുള്ള ഐസിഫോസിന്റെ വൈദഗ്ധ്യവും കാര്‍ഷികമേഖലയിലുള്ള ഐഐഎച്ച്ആറിന്റെ വൈദഗ്ധ്യവും കാര്‍ഷിക/ഹോര്‍ട്ടികള്‍ച്ചറല്‍ മേഖലയില്‍ ഏകോപിപ്പിക്കുന്നതിന്റെ ഭാഗമായാണ് പരസ്പര സഹകരണത്തിന് ധാരണയില്‍ എത്തിച്ചേര്‍ന്നത്. ബെംഗളൂരുവിലെ ഐഐഎച്ച്ആര്‍ കാര്യാലയത്തില്‍ നടന്ന ചടങ്ങില്‍ ഐഐഎച്ച്ആര്‍ മേധാവി ഡോ. തുഷാര്‍ കാന്തി ബെഹ്‌റയും ഐസിഫോസ് മേധാവി ഡോ. സുനില്‍ ടി ടി യും ധാരണാപത്രത്തില്‍ ഒപ്പുവച്ചു. ഐ ഐ എച്ച് ആര്‍ പ്രിന്‍സിപ്പല്‍ സയന്റിസ്റ്റുമാരായ ഡോ. ഇ . ശ്രീനിവാസ റാവു, ഡോ. സെന്തില്‍ കുമരന്‍, ഡോ. ജി കരുണാകരന്‍, ഡോ. ശ്രീധര്‍ കുട്ടം, ഐസിഫോസ് മാനേജര്‍ ജയകുമാര്‍ കെ.എസ് എന്നിവര്‍ പങ്കെടുത്തു.
പ്രതികരിക്കാൻ ഇവിടെ എഴുതുക: