‘ ഏജന്റാണ് രാത്രി വൈകി തങ്ങളെ ഇന്ത്യയിലെത്തിച്ചത് ‘ ; ഇന്ത്യയിലേയ്‌ക്ക് കടക്കാൻ ശ്രമിച്ച നാലു ബംഗ്ലാദേശികൾ അറസ്റ്റിൽ

ധർമ്മനഗർ ; അനധികൃതമായി ഇന്ത്യയിലേയ്‌ക്ക് കടക്കാൻ ശ്രമിച്ച നാലു ബംഗ്ലാദേശികൾ അറസ്റ്റിൽ. വടക്കുകിഴക്കൻ സംസ്ഥാനമായ ത്രിപുരയിലെ ധർമ്മനഗർ റെയിൽവേ സ്റ്റേഷനിൽ നിന്നാണ് രണ്ട് പുരുഷന്മാരെയും രണ്ട് സ്ത്രീകളെയും പോലീസ് പിടികൂടിയത് .

മുഹമ്മദ് ഹനീഫ്, യൂസഫ് അലി, പരുൾ ബീഗം, ജാസ്മിൻ അക്തർ എന്നിവരാണ് പിടിയിലായത് . ചോദ്യം ചെയ്യലിൽ ബംഗ്ലാദേശ് സ്വദേശികളാണെന്നും അനധികൃതമായി അതിർത്തി കടന്നതായും ഇവർ സമ്മതിച്ചു.

സ്റ്റേഷൻ റോഡിന് സമീപം സംശയാസ്പദമായ രീതിയിൽ കണ്ട ഇവരെ പട്രോളിംഗ് സംഘം കസ്റ്റഡിയിലെടുക്കുകയായിരുന്നുവെന്ന് റിപ്പോർട്ടുകൾ പറയുന്നു. രണ്ട് ദിവസം മുമ്പ് ഏജന്റാണ് തങ്ങളെ കൊണ്ടുവന്നതെന്നും , ത്രിപുരയുടെ ഏത് ഭാഗത്താണ് കടന്നതെന്ന് തങ്ങൾക്ക് അറിയില്ലെന്നുമാണ് പിടിയിലായവർ പോലീസിനോട് പറഞ്ഞത് .

ശനിയാഴ്ച ട്രെയിനിൽ ബെംഗളൂരുവിലേക്ക് പോകേണ്ടതായിരുന്നുവെന്നും ഇവർ പറഞ്ഞു.ബംഗ്ലാദേശിലെ ഖുൽന ഡിവിഷനിലെ താമസക്കാരാണ് പിടിയിലായവർ.