തിരുവനന്തപുരം: വിവാഹ സൽക്കാരത്തിനായി വധുവിന്റെ വീട്ടുകാർ വന്ന ബസിൽ പാട്ട് ഇട്ടതിന്റെ പേരിൽ തർക്കം. സംഘർഷമുണ്ടാക്കിയ രണ്ട് പേരെ പോലീസ് അറസ്റ്റിൽ. നെടുമങ്ങാട് കോട്ടുകാൽ സ്വദേശി ഫൈസൽ, കല്ലറ സ്വദേശി ഷഹീദ് എന്നിവരാണ് അറസ്റ്റിലായത്.
കഴിഞ്ഞ ദിവസം നെടുമങ്ങാട് ഗ്രീൻലാൻഡ് ഓഡിറ്റോറിയത്തിൽ നെടുമങ്ങാട്, കല്ലറ സ്വദേശികളുടെ വിവാഹ സൽക്കാരത്തിനിടെയായിരുന്നു സംഘർഷം. യുവതിയുടെ വീട്ടുകാരെത്തിയ ബസിൽ പാട്ട് വച്ചതിന് തുടർന്നുള്ള തർക്കം അടിപിടിയിൽ കലാശിക്കുകയായിരുന്നു. ബസിൽ നിന്ന് ആളുകൾ ഓഡിറ്റോറിയത്തിലേയ്‌ക്ക് ഇറങ്ങുന്നതിനിടെ ഇതുസംബന്ധിച്ച് വാക്കുതർക്കവും അടിപിടിയും ഉണ്ടാവുകയായിരുന്നു.
സംഭവത്തിൽ കല്ലറ സ്വദേശി ഷാഹിദിനും ഭാര്യ ആൻസിക്കും ഒന്നര വയസുകാരൻ മകനും പരിക്കേറ്റു. ഇവരെ ഫൈസൽ, ഷാഹിദ്, റിട്ടയേർഡ് പോലീസ് ഉദ്യോഗസ്ഥൻ ജലാലുദ്ദീൻ, ഷാജി എന്നിവർ ചേർന്ന് ദേഹോപദ്രവം ഏൽപ്പിച്ചെന്നാണ് പരാതി. ഇതിൽ ഫൈസൽ, ഷാഹിദ് എന്നിവരെ കോടതിയിൽ ഹാജരാക്കി റിമാൻഡ് ചെയ്തു. സംഭവറിഞ്ഞെത്തിയ പോലീസിനെയും പ്രതികൾ കയ്യേറ്റം ചെയ്തു. ഈ സംഭവത്തിലും പോലീസ് കേസെടുത്ത് അന്വേഷണം ആരംഭിച്ചു.
മദ്യലഹരിയിലായിരുന്ന പ്രതികൾ ബലപ്രയോഗം നടത്തിയതിന്റെ ഫലമായി എസ് ഐയ്‌ക്ക് പരിക്കേറ്റു. തുടർന്ന് അദ്ദേഹം നെടുമങ്ങാട് ജില്ലാ ആശുപത്രിയിൽ ചികിത്സ തേടി. കയ്യേറ്റത്തിനിടെ എസ് ഐയുടെ ഫോൺ നിലത്തുവീണ് പൊട്ടുകയും ചെയ്തു. സംഘർഷത്തിൽ പരിക്കേറ്റ അൻസിയെയും മകനെയും ജില്ലാ ആശുപത്രിയിൽ പ്രവേശിപ്പിച്ചു. വയറിനും തലയ്‌ക്കും പരിക്കേറ്റതിനാൽ കുഞ്ഞിനെ പിന്നീട് എസ് എ ടി ആശുപത്രിയിലേയ്‌ക്ക് മാറ്റി.
പ്രതികരിക്കാൻ ഇവിടെ എഴുതുക: