ലുധിയാന: എംഎസ് ധോണിയെ വിമര്ശിച്ച് വീണ്ടും മുന് ഇന്ത്യന് ക്രിക്കറ്റ് താരം യുവരാജ് സിംഗിന്റെ പിതാവ് യോഗ്രാജ് സിംഗ്. ജീവിതത്തില് ഒരിക്കലും ധോണിക്ക് മാപ്പ് നല്കില്ലെന്ന്് യോഗ്രാജ് സിംഗ് വ്യക്തമാക്കി. സീ സ്വിച്ച് എന്ന യൂട്യൂബ് ചാനലിനോടാണ് അദ്ദേഹത്തിന്റെ പ്രതികരണം.
ധോണിയാണ് യുവരാജിന്റെ കരിയര് നശിപ്പിച്ചത്.ധോണിയുടെ സ്വാധീനമില്ലായിരുന്നെങ്കില് യുവരാജിന്റെ കരിയര് നാലഞ്ചു കൊല്ലം കൂടി തുടരുമായിരുന്നുവെന്നും യോഗ്രാജ് സിംഗ് പറഞ്ഞു.
എംഎസ് ധോണി കണ്ണാടിയില് അദ്ദേഹം സ്വന്തം മുഖം നോക്കണം. അദ്ദേഹം വളരെ വലിയ ക്രിക്കറ്റ് കളിക്കാരനാണ്. എന്നാല് യുവരാജിനെതിരെ ചെയ്തതെല്ലാം ഇപ്പോള് പുറത്തുവരുന്നു. അത് ഒരിക്കലും പൊറുക്കാവുന്നതല്ല.
ജീവിതത്തില് താന് ഒരിക്കലും ചെയ്യാത്ത രണ്ട് കാര്യങ്ങളുണ്ട്. ഒന്ന്, എന്നോട് തെറ്റ് ചെയ്തവരോട് ക്ഷമിക്കില്ല. രണ്ട്, അവരെ ഒരിക്കലും ഞാന് ആലിംഗനം ചെയ്യില്ല. അത് ഇനി ആരായാലും അങ്ങനെ തന്നെയാകും- യോഗ്രാജ് സിംഗ് പറഞ്ഞു.
ധോണിക്കെതിരെ യോഗ്രാജ് സിംഗ് മുമ്പും രംഗത്ത് വന്നിരുന്നു. ധോണിയുടെ മോശം പ്രവൃത്തികള് കാരണം 2024 ഐപിഎല് ചെന്നൈ സൂപ്പര് കിംഗ്സിന് നഷ്ടമായെന്ന് അദ്ദേഹം നേരത്തെ ആരോപിച്ചിരുന്നു. യുവരാജിനോട് ധോണിക്ക് അസൂയയുണ്ടെന്നും കുറ്റപ്പെടുത്തിയിരുന്നു.
