കൊച്ചി: നടി ബീന ആന്റണി നടന്‍ സിദ്ദിഖിനെ ആശ്ലേഷിക്കുന്ന വിഡിയോ വൈറലായതിന് പിന്നാലെ ട്രോളുമായി.ഇതോടെ ഇപ്പോള്‍ വിശദീകരണവുമായി എത്തിയിരിക്കുകയാണ് നടി.
ഈ വിഡിയോ ട്രോളായത് ഏറെ വിഷമിച്ചു എന്ന് നടി ഇന്‍സ്റ്റാഗ്രം വിഡിയോയിലൂടെ അറിയിച്ചു. സിദ്ദിഖ് രാജിവച്ചതിന് പിന്നാലെ ബീന ആന്റണി കെട്ടിപ്പിടിച്ച് ആശ്വസിപ്പിക്കുന്നു എന്ന തരത്തിലാണ് വിഡിയോ പ്രചരിച്ചത്. എന്നാല്‍ മറ്റൊരു സന്ദര്‍ഭത്തിലെ വീഡിയോ ആണ് ഇപ്പോള്‍ മറ്റൊരര്‍ത്ഥത്തില്‍ പ്രചരിക്കുന്നതെന്ന് ബീന ആന്റണി അറിയിച്ചു.
സിദ്ദിഖിന്റെ മകന്‍ സാപ്പി മരിച്ച സമയത്ത് പനിയായി കിടപ്പിലായതിനാല്‍ പോകാന്‍ സാധിച്ചില്ല.പിന്നീട് സിദ്ദിഖിനെ കണ്ടത് അമ്മയുടെ പൊതുയോഗ വേളയിലാണ്. അന്ന് അദ്ദേഹത്തെ ആശ്വസിപ്പിച്ച വിഡിയോയാണ് ഇപ്പോള്‍ പ്രചരിക്കുന്നത്. സാപ്പിയെ കുഞ്ഞായിരിക്കുമ്പോള്‍ മുതല്‍ അറിയാമെന്നും ബീനാ ആന്റണി വ്യക്തമാക്കി. മൂന്ന് ദിവസം മുമ്പ് പോസ്റ്റ് ചെയ്ത വിഡിയോ സമൂഹമാധ്യമങ്ങളില്‍ വൈറലായി.
പ്രചരിക്കുന്ന വീഡിയോ ഭര്‍ത്താവിന്റെയും തന്റെയും കുടുംബ ഗ്രൂപ്പുകളില്‍ അടക്കം വളരെ അധികം ചര്‍ച്ച ചെയ്യപ്പെട്ടതാണ്. ട്രോളായും ഇത് പ്രചരിക്കുന്നു. സഹോദരിമാരുടെ ഓഫീസില്‍ അടക്കം ഈ വിഡിയോ ചര്‍ച്ചയായെന്ന് ബീന ആന്റണി പറയുന്നു.
മരണം അവനവന്റെ ജീവിതത്തില്‍ സംഭവിക്കുമ്പോഴെ വിഷമം അറിയാന്‍ പറ്റു. അല്ലാതെ പുറത്ത് നിന്ന് നോക്കുമ്പോള്‍ ഭയങ്കര തമാശയായി തോന്നാമെന്നും ബീന ആന്റണി പറയുന്നു. തന്റെ അപ്പച്ചന്‍ മരിച്ചപ്പോഴും തന്റെ സഹോദരിയുടെ മകന്‍ മരിച്ചപ്പോഴുമെല്ലാം സിദ്ദിഖ് വിളിച്ച് സമാധാനിപ്പിച്ചിട്ടുണ്ട്. അതൊക്കെ ഒരു സഹോദരി, കുടുംബത്തിലെ അംഗം എന്നൊക്കെയുള്ള നിലയില്‍ തന്നെ അദ്ദേഹം കാണുന്നത് കൊണ്ടാണ്.
സിദ്ദിഖ് ഇക്കയുടെ പേരില്‍ ഇപ്പോള്‍ ഒരു ആരോപണം വന്നു. ഇക്ക അങ്ങനെ ചെയ്തിട്ടുണ്ടെങ്കില്‍ നിയമത്തിന്റെ ശിക്ഷ അദ്ദേഹത്തിന് കിട്ടട്ടെ. പലരും ആ വിഡിയോ തമാശയാക്കി എടുത്തു. വിരമിക്കുന്ന സിദ്ദിഖിന് നടിമാര്‍ കൊടുക്കുന്ന യാത്രയയപ്പ് എന്നൊക്കെ ക്യാപ്ഷനിട്ട് കണ്ടു. അത് കണ്ടപ്പോള്‍ ഒരുപാട് സങ്കടം തോന്നിയെന്നും വിഡിയോയില്‍ ബീന ആന്റണി പറയുന്നു.
പ്രതികരിക്കാൻ ഇവിടെ എഴുതുക: