തിരുവനന്തപുരം: വയനാട് ഉരുള്പൊട്ടല് ദുരന്തബാധിതരുടെ പുനരധിവാസത്തിന്റെ ഭാഗമായി 1000 സ്ക്വയര്ഫീറ്റില് ഒറ്റനില വീട് നിര്മിക്കാനാണ് സര്ക്കാര് ഉദ്ദേശിക്കുന്നതെന്ന് മുഖ്യമന്ത്രി പിണറായി വിജയന് സര്വകക്ഷിയോഗത്തില് പറഞ്ഞു. ഭാവിയില് രണ്ടാമത്തെ നിലകൂടിക്കെട്ടാന് സൗകര്യമുള്ള രീതിയിലാകും അടിത്തറ പണിയുക. വീടുകള് ഒരേ രീതിയിലാകും നിര്മ്മിക്കുകയെന്നും ഗുണനിലവാരം ഉറപ്പുവരുത്തുമെന്നും മുഖ്യമന്ത്രി പറഞ്ഞു. വിലങ്ങാടിലെ ദുരന്തബാധിതര്ക്കും പുനരധിവാസം ഉറപ്പാക്കും.
വീട് നഷ്ടപ്പെട്ടവര്ക്കാണ് മുന്ഗണന നല്കുക. മാറി താമസിക്കേണ്ടി വന്നവരെ രണ്ടാം ഘട്ടത്തില് പരിഗണിക്കും. ജീവനോപാധി ഉറപ്പാക്കും. പരമാവധി പേര്ക്ക് തൊഴില് ഉറപ്പുവരുത്തും. എല്ലാ സ്ത്രീകള്ക്കും താല്പര്യമുള്ള തൊഴിലില് ഏര്പ്പെടുന്നതിന് ആവശ്യമായ പരിശീലനവും ഇതോടൊപ്പം നല്കും. വാടകകെട്ടിടങ്ങളില് കച്ചവടം നടത്തുന്നവരെയും സംരക്ഷിക്കും.
ബാങ്കുകളില് നിന്നും സ്വകാര്യ മേഖലയില് നിന്നും കടമെടത്തവ എഴുതി തള്ളുകയെന്ന നിലപാടിലാണ് ബാങ്കിങ്ങ് മേഖല ഇപ്പോള് ഉള്ളത്. അവസാന തീരുമാനം ബാങ്ക് ഭരണ സമിതികളിലാണ് ഉണ്ടാകേണ്ടത്. റിസര്വ് ബാങ്കിനെയും കേന്ദ്ര ധനമന്ത്രാലയത്തെയും ഇതിനായി ബന്ധപ്പെടും. സപ്തംബര് രണ്ടി സ്കൂള് പ്രവേശനോത്സവം നടത്തും. ദുരന്തബാധിത പ്രദേശത്തെ സ്കൂളിനോടുള്ള വികാരം കണക്കിലെടുത്ത് അത് പുനര്നിര്മ്മിച്ച് നിലനിര്ത്താനാവുമോ എന്ന് പരിശോധിക്കുമെന്നും മുഖ്യമന്ത്രി പറഞ്ഞു.
