കൊച്ചി: കേരളത്തിലെ ഫുട്‌ബോള്‍ കളിയാരവങ്ങള്‍ക്ക് ആവേശം തീര്‍ക്കാന്‍ എത്തുന്ന ആദ്യ സൂപ്പര്‍ ലീഗ് കേരളയുടെ ടൈറ്റില്‍ സ്‌പോണ്‍സറായെത്തുക മഹീന്ദ്ര. മഹീന്ദ്ര സൂപ്പര്‍ ലീഗ് കേരള എന്നായിരിക്കും കേരളത്തിന്റെ ആദ്യ ഫുട്‌ബോള്‍ ലീഗ് അറിയപ്പെടുകയെന്ന് സൂപ്പര്‍ ലീഗ് കേരള ഡയറക്ടര്‍ ഫിറോസ് മീരാന്‍ പത്രസമ്മേളനത്തില്‍ പറഞ്ഞു.
സപ്തംബര്‍ 7ന് വൈകുന്നേരം 7.30ന് കൊച്ചി ജവഹര്‍ലാല്‍ നെഹ്‌റു ഇന്റര്‍നാഷണല്‍ സ്റ്റേഡിയത്തിലാണ് ലീഗിന്റെ തുടക്കം. ഫോഴ്‌സാ കൊച്ചി എഫ്‌സിയും മലപ്പുറം എഫ്‌സിയും തമ്മിലാണ് ആദ്യ മത്സരം. വര്‍ണാഭമായ തുടക്കത്തിന് രാജ്യത്തെ പ്രമുഖ താരങ്ങള്‍ സാക്ഷിയാകും. 45 ദിവസത്തെ ലീഗില്‍ 33 മത്സരങ്ങള്‍. സ്റ്റാര്‍ട്ട് സ്‌പോര്‍ട്‌സ് 1 ല്‍ തത്സമയ സംപ്രേഷണം. വെബ് സ്ട്രീമിംഗ് ഡിസ്‌നി പ്ലസ് ഹോട്ട്സ്റ്റാറില്‍. ലീഗിന്റെ മിഡില്‍ ഈസ്റ്റ് സംപ്രേഷണ അവകാശത്തിനുള്ള അവസാനവട്ട ചര്‍ച്ചയിലാണെന്നും ഫിറോസ് മീരാന്‍ പറഞ്ഞു.
ടിക്കറ്റുകള്‍ പേടിഎം വഴി ബുക്ക് ചെയ്യാം. ഉദ്ഘാടന മത്സരത്തിന്റെ ടിക്കറ്റുകള്‍ ഇന്ന് മുതല്‍ ബുക്ക് ചെയ്യാം. ഫോഴ്‌സാ കൊച്ചി എഫ്‌സി, മലപ്പുറം എഫ്‌സി, തിരുവനന്തപുരം കൊമ്പന്‍സ് എഫ്‌സി, കണ്ണൂര്‍ വാരിയേഴ്‌സ് എഫ്‌സി, കാലിക്കറ്റ് എഫ്‌സി, തൃശൂര്‍ എഫ്‌സി എന്നിങ്ങനെ ആറ് ഫ്രാഞ്ചൈസി ടീമുകളാണ് പ്രഥമ സൂപ്പര്‍ ലീഗ് കേരളയില്‍ മത്സരിക്കുക.
വയനാട് ദുരിതബാധിതരെ സഹായിക്കുന്നതിനായി ഈ മാസം 30ന് മലപ്പുറം മഞ്ചേരി ഫുട്‌ബോള്‍ സ്റ്റേഡിയത്തില്‍ മഹിന്ദ്ര സൂപ്പര്‍ ലീഗ് കേരള ഓള്‍ സ്റ്റാഴ്‌സും മുഹമ്മദന്‍ സ്‌പോര്‍ട്ടിംഗ് ക്ലബ്ബും തമ്മില്‍ ചാരിറ്റി മത്സരം സംഘടിപ്പിക്കുമെന്ന് മഹിന്ദ്ര സൂപ്പര്‍ ലീഗ് കേരള സിഇഒ മാത്യു ജോസഫ് പറഞ്ഞു. മത്സരത്തിന്റെ ഭാഗമായി ലഭിക്കുന്ന മുഴുവന്‍ തുകയും മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കുമെന്നും അദ്ദേഹം അറിയിച്ചു.
മഹിന്ദ്ര സൂപ്പര്‍ ലീഗിന്റെ ഭാഗമായി മാധ്യമ അവാര്‍ഡുകളും ഏര്‍പ്പെടുത്തി. പത്രം, ടെലിവിഷന്‍, ഓണ്‍ലൈന്‍ വിഭാഗങ്ങളിലെ മികച്ച റിപ്പോര്‍ട്ടര്‍, ക്യാമറാമാന്‍ എന്നിവര്‍ക്ക് ഒരു ലക്ഷവും, 50000 രൂപയുമാണ് അവാര്‍ഡ്.
രാജ്യത്താകെ ഫുട്‌ബോളിനെ മാറ്റത്തിന്റെ പാതയിലേക്ക് നയിക്കാന്‍ സൂപ്പര്‍ ലീഗ് കേരളക്ക് കഴിയുമെന്ന് കേരള ഫുട്‌ബോള്‍ അസോസിയേഷന്‍ പ്രസിഡന്റ് നവാസ് മീരാന്‍ പറഞ്ഞു.
പ്രതികരിക്കാൻ ഇവിടെ എഴുതുക: