ബെംഗളൂരു: ഷിരൂരില് മണ്ണിടിച്ചിലില് കാണാതായ കോഴിക്കോട് സ്വദേശി ട്രക്ക് ഡ്രൈവര് അര്ജുനും ലോറിക്കും വേണ്ടി തെരച്ചില് നടത്താന് ഡ്രഡ്ജര് എത്തിക്കുമെന്ന് കര്ണാടക സര്ക്കാര്. ഗോവയില് നിന്ന് ഡ്രഡ്ജര് എത്തിക്കാനുളള ചെലവ് പൂര്ണമായും കര്ണാടക സര്ക്കാര് വഹിക്കും. ഇക്കാര്യത്തില് അര്ജുന്റെ കുടുംബത്തിന് മുഖ്യമന്ത്രി സിദ്ധരാമയ്യ ഉറപ്പ് നല്കി.
ഡ്രഡ്ജര് എത്തിക്കാന് ഒരു കോടി രൂപയാണ് ചെലവ് പ്രതീക്ഷിക്കുന്നത്.ഡ്രഡ്ജര് എത്തിച്ച് എത്രയും വേഗം തെരച്ചില് പുനരാരംഭിക്കണമെന്നാണ് ബുധനാഴ്ച നടന്ന കൂടിക്കാഴ്ചയില് അര്ജുന്റെ കുടുംബം ആവശ്യപ്പെട്ടത്. അര്ജുന്റെ സഹോദരി ഭര്ത്താവ് ജിതിന്, എംകെ രാഘവന് എംപി, മഞ്ചേശ്വരം എംഎല്എ എ കെ എം അഷറഫ്, കാര്വാര് എംഎല്എ സതീഷ് സെയ്ല് എന്നിവരാണ് കര്ണാടക മുഖ്യമന്ത്രിയെ കണ്ടത്. ഗംഗാവലി പുഴയില് മണ്ണ് അടിഞ്ഞതിനാല് ഡ്രഡ്ജിംഗ് നടത്താതെ തെരച്ചിലിന് കഴിയില്ല.
ദുരന്തനിവാരണ വകുപ്പിന്റെ ചുമതല വഹിക്കുന്ന ഉപമുഖ്യമന്ത്രി ഡി കെ ശിവകുമാറിനെയും സംഘം കാണുന്നുണ്ട്. ഒഴുക്കിലും മണ്ണിളക്കി പരിശോധിക്കാനാവുന്ന ഗോവയില് നിന്ന് എത്തിക്കുന്ന ഡ്രഡ്ജറിന് 15 അടി താഴ്ച വരെ മണ്ണ് ഇളക്കാന് കഴിയും.
